Búgin Parlament palatalarynyń birlesken otyrysy ótip, onda altynshy sailanǵan Parlamenttiń besinshi sessiiasy resmi túrde jabyldy, dep habarlaidy Parlament Májilisi baspasóz qyzmeti.
Soǵan orai, depýtattar biylǵy 1 qyrkúiekke deiin parlamenttik kanikýl dep jariialanatyny týraly arnaiy qaýly qabyldady.
Altynshy sailanǵan Qazaqstan Respýblikasy Parlamentiniń besinshi sessiiasy zań shyǵarý jumysynyń kólemi boiynsha da, sondai-aq mindetterdi sheshý turǵysynda da óte aýqymdy boldy.
Atap aitqanda, ótken sessiia barysynda palatalardyń birlesken 3 otyrysy ótti. Májilistiń 41 jalpy otyrysynda 296 másele qaralsa, Senattyń 25 jalpy otyrysynda 165 másele qozǵaldy. Besinshi sessiia kezinde qos palatanyń qaraýynda 161 zań jobasy boldy, onyń 98-i qabyldandy. Parlament qabyldaǵan zańdardyń 86-syna Memleket basshysy qol qoiyp, olar zańdy kúshine endi.
«Osy sessiiada depýtattar ózderi bastamashy bolyp, 35 zań jobasyn ázirledi, olardyń 12-si qazirdiń ózinde qabyldanyp, 23-i boiynsha jumys júrgizilip jatyr. Depýtattyq bastama jasaýdyń mundai joǵary kórsetkishine birinshi ret qol jetkizilip otyr. Parlament depýtattary besinshi sessiia barysynda ózderi ázirlegen zań jobalarynyń sany aldyńǵy tórt sessiia ishindegi kórsetkishten eki ese derlik kóp», - delingen Parlament Májilisi baspasóz qyzmetiniń málimetinde.
Ótken sessiiada Parlamentte 13 Úkimet saǵaty, 5 parlamenttik tyńdaý, 20 dóńgelek ústel otyrysy, komitetterdiń 27 kóshpeli otyrysy jáne 2 konferentsiia ótti. Parlamenttik tyńdaýlar agroónerkásiptik keshendi damytý, Qazaqstannyń sý qaýipsizdigi, zań shyǵarý protsesin odan ári jetildirý siiaqty máselelerge arnaldy.
Sessiia jumysy kezeńinde Parlamenttiń qos Palatasynyń depýtattary 308 depýtattyq saýal (onyń 204-in – Májilis depýtattary, 104-in – Senat depýtattary) joldady. Osy sessiia barysynda Parlament depýtattaryna azamattardan shamamen 9733 hat kelip tústi, olar qoldanystaǵy zańnamaǵa sáikes qaraldy.
