Parijde qazaqstandyq mýzykalyq mádeniettiń ozyq úlgilerin pash etken «FORTE-TRIO» ujymyna frantsýz jurtshylyǵy zor qoshemet kórsetti, dep habarlaidy QazAqparat QR Syrtqy ister ministrliginiń baspasóz qyzmetine silteme jasap.
Sheteldik kórermenderdi tamsandyrǵan «FORTE-TRIO» memlekettik triosynyń bul kontserti Qazaqstan Táýelsizdiginiń 30 jyldyq mereitoiyna arnalǵan halyqaralyq gastrolder aiasynda ótti.
Qazaqstandyq ártister Parij tórinde ornalasqan áigili Sortot zalynda óner kórsetti. Ǵasyrǵa jýyq tarihy bar, akýstikasy erekshe bul kontserttik zaldy álemdik klassikalyq ónerdiń jaryq juldyzdary erekshe baǵalaidy.
FORTE-TRIO kontserti týraly osydan biraz ýaqyt buryn Sortot zalynyń saitynda jariialanǵan afisha kórermen nazaryna birden ilikti. Trionyń sheberligi qazaqstandyq ártisterdiń ónerin tamashalaýdy asyǵa kútken kórermenderdiń kóńilinen shyqty. Trio ártisteri – Qazaqstannyń eńbek sińirgen qairatkeri, ujymnyń negizin qalaýshy Timýr Ýrmancheev (fortepiano), halyqaralyq baiqaýlardyń laýreattary Murat Narbekov (violonchel) pen Sholpan Mankeeva (skripka) otandyq mýzykalyq ónerdi joǵary deńgeide kórsete bildi.
Ulttyq jáne álemdik klassikalyq repertýardan turatyn kontserttik baǵdarlama talǵampaz sheteldik kórermendi birden baýrap aldy. Ártister halqymyzdyń ulttyq qundylyqtary kórinis tapqan «Iapýrai» jáne «Kóroǵly» týyndylaryn usyndy. Sondai-aq S.Rahmaninov, K.Debiýssi, I.Brams syndy álemdik kompozitorlarynyń úzdik shyǵarmalary oryndaldy. Trio Eýraziia keńistiginde ornalasqan ujym retinde túrli mýzykalyq baǵyttardy sheber igergenin taǵy da dáleldei tústi. Ystyq yqylasyn aiamaǵan tyńdarman ártisterge zor qoshemet kórsetip, birneshe ret biske shaqyrdy.
Kontsertke arnaiy shaqyrylǵan Qazaqstannyń Frantsýz Respýblikasyndaǵy elshisi Jan Ǵaliev, «Habar» Agenttigi» AQ Basqarma Tóraǵasy Erlan Bekhojin, IýNESKO ókilderi kontsertke joǵary baǵasyn berdi.
Qazaqstan elshisi Jan Ǵaliev atap ótkendei, FORTE-TRIO gastrolderi eki el arasyndaǵy mádeni yntymaqtastyqtyń nyǵaia túsýine óz úlesin qosty.
- Frantsýz halqy osy kontsertte elimizdiń klassikalyq mýzyka óneriniń úzdik úlgilerin tamashalai alǵandyǵyn maqtan tutamyn. Bul keshte kórermen bizdiń ártisterdi san márte biske shaqyryp, jibergisi kelmedi. Menińshe, osyndai zor yqylas – qazaqstandyq ártisterdiń ónerine berilgen naǵyz joǵary baǵa. Eýropa tórinde turyp jatqan barsha qazaqstandyqtar úshin bul erekshe maqtanysh. Osyndai úlken kontserttiń Táýelsizdik merekesi jáne Qazaqstan men Frantsiia arasyndaǵy diplomatiialyq qarym-qatynastardyń 30 jyldyǵy qarsańynda ótip jatqany qýantady, - dedi Jan Ǵaliev.
Halyqaralyq gastrolder aiasynda ótken alǵashqy kontsertten alǵan áserimen Qazaqstannyń eńbek sińirgen qairatkeri, pianist Timýr Ýrmancheev bólisti:
«Parij kórermenderi bizdi óte jaqsy qabyldady. Bizdiń trio sheteldegi otandastarymyz úshin osyndai merekelik kontsert ótkizgenine qýanyshtymyn».
Kontsertten keiin kóp kórermen óz pikirlerin ortaǵa saldy. Olardyń qatarynda belgili aqyn Tólegen Aibergenovtyń nemeresi Ainar Aibergenova da boldy.
- Sóz joq, tamasha kontsert. Sheteldikter bul kontsertten Qazaqstannyń bai mádenietin tani aldy. Ártisterdiń ónerin airyqsha atap ótken jón. Parij tórinde ótip jatqan mundai keremet kontserttiń kýágeri bolǵanyma rizamyn, - dep jetkizdi ol.
Trionyń Frantsiiadaǵy gastroldik sapary 23 jeltoqsanǵa deiin jalǵasady. Kelesi kontsertter Theatre de la sinne (Miýlýz, 16 jeltoqsan) teatrynda, Meriianyń tarihi saraiynda (Nansi, 17 jeltoqsan) jáne ataqty «Moliere» zalynda (Lion, 22 jeltoqsan) ótedi.
Eske salsaq, «Forte Trio» – elimizdegi belgili kameralyq-aspaptyq ansamblderdiń biri. Trionyń shyǵarmashylyǵy Qazaqstanda da, shetelde de keńinen tanylǵan. Forte Trio Mádeniet jáne sport ministrligine qarasty «Roza Baǵlanova atyndaǵy «Qazaqkontsert» memlekettik kontserttik uiymynyń quramyn kiredi.
