Parij mańyndaǵy Arjantioide eki myńnan astam adam 14 jasar Alishany eske alýǵa arnalǵan «aq marshqa» qatysty, dep habarlaidy Euronews.
8 naýryz kúni ony synyptastary soqqyǵa jyǵyp, Senaǵa iterip jibergen soń, sýǵa batyp qaza tapty. Bul oqiǵaǵa deiin boijetken qyzdyń synybyndaǵy qurby-qurdastary onyń dárejesin túsirip, aýyr sózder aitqan, áleýmettik jelide jeke paraqshasyn buzyp ashý arqyly intimdik fotosýretterin qolǵa túsirip, jábir kórsetken.
Alishanyń anasy: «Bul oqiǵanyń bolǵanyna sene alar emespin. Onyń qatygezdik, aiýandyqpen kóz jumǵanyn oilaǵanda, uiyqtai almaimyn. Men ózimdi jalǵyz sezinip júrmin, júregimniń bir bólsheginen aiyrylǵandai kúidemin», - deidi.
Tergeý málimetinshe, Alisha buryn jaqyn bolyp, keiin aralary sýyp ketken dostarynyń qolynan qaza tapqan. Mekteptegi teris áreketteri sebebimen litseiden ýaqytsha oqýdan shyǵarylǵan olar Alishany adam kóp júrmeitin jerge shaqyryp alyp, soqqyǵa jyǵyp, sýǵa iterip jibergen. Ol kezde boijetken áli esinen tanbaǵan edi.
Alishanyń ólimine kináli ul bala men qyz qamaýǵa alyndy. Olarǵa adam óltirgeni úshin aiyp taǵyldy.
