QR Qarýly Kúshteri Bas shtaby Uiymdastyrý-jumyldyrý jumystary departamentiniń bastyǵy Sáken Júsipov Aqtaýda parashiýti ashylmai, qaza bolǵan sarbazdyń ólimine jaýapty tulǵalardy jazaǵa tartý máselesine pikir bildirdi, dep habarlaidy "Ult aqparat".
«Qorǵanys ministriniń tapsyrmasymen bizde áskeri qyzmettiń qaýipsizdigin qamtamasyz etetin arnaiy bólimsheler qurylǵan. Ol bólimsheler barlyq komandirmen jáne bastyqtarmen birge áskeri qyzmettiń qaýipsizdigin baqylaidy. Bul oqiǵaǵa keler bolsaq, qazirgi ýaqytta meniń bilýimshe, tergeý amaldary júrgizilip jatyr. Onyń aiaqtalýyna bailanysty tiisti sheshim shyǵady», – dedi Sáken Júsipov búgin Ortalyq kommýnikatsiialar qyzmeti alańynda tilshilerdiń suraǵyna jaýap bere otyryp.
Onyń aitýynsha, áskeri qyzmetshilerdiń qaýipsizdigi eń mańyzdy másele bolyp sanalady.
«Álbette, eń birinshi kezekte merzimdi áskeri qyzmettegi sarbazdardyń qaýipsizdigi úshin alańdaimyz. Keiingi jyldary merzimdi áskeri qyzmettegi sarbazdardyń jaraqat alý jaǵdaiy azaidy», - dedi Sáken Júsipov.
Eske sala ketsek, oqiǵa Mańǵystaý oblysynda ótken aida bolǵan edi. Jaýyngerlik daiarlyq barysynda áskeri qyzmetshilerdiń biriniń parashiýty ashylmai qaldy.
