Sýret: Senat
Buqaralyq aqparat quraldarynyń qyzmetkerleri kúni qarsańynda Parlament Senatynda jýrnalister arasyndaǵy «Parasat» baiqaýynyń laýreattaryn marapattaý rásimi ótti. Palata Tóraǵasy Máýlen Áshimbaev ár atalym boiynsha úzdik shyqqan jeńimpazdardy quttyqtap, júldelerin saltanatty túrde tapsyrdy, dep habarlaidy "Ult aqparat".
Máýlen Áshimbaev jýrnalister qaýymyn quttyqtai kele, buqaralyq aqparat quraldary Ádiletti Qazaqstan qurý baǵdaryn iske asyrýǵa belsendi qatysyp kele jatqan mańyzdy institýttardyń biri ekenin aitty. Senat Spikeri jýrnalisterdiń parlamenttik pýly zań shyǵarýshy organ men qoǵamdy bailanystyratyn mánge ie ekenin de tilge tiek etti. Sondai-aq ol elimizde bolyp jatqan oqiǵalar, Memleket basshysynyń bastamasymen qolǵa alynǵan reformalar, senatorlardyń jumysy jáne zańnamalyq ózgerister men qabyldanǵan sheshimder jaiynda aqparat taratyp, olardyń mańyzyn halyqqa dáiekti túrde jetkizip júrgen tilshiler qaýymy memleketimizdiń damýyna úlken úles qosyp otyrǵanyn atap ótti.
«Sońǵy jyldarda elimizde Memleket basshysynyń bastamasymen Ádiletti Qazaqstan qurý jolynda aýqymdy jumys atqarylyp jatyr. Prezidentimiz Qasym-Jomart Kemeluly Toqaev atap ótkendei, bul – barsha qazaqstandyqtyń aldynda turǵan mańyzdy mindet. Osyǵan bailanysty keshendi saiasi, ekonomikalyq, áleýmettik reformalar iske asyrylyp keledi. Ulttyq qundylyqtardy dáripteý, ideologiia baǵytynda da mańyzdy qadamdar jasalýda. Memleket basshysy Ulttyq quryltaidyń úshinshi otyrysynda osy saladaǵy negizgi basymdyqtardy belgilep berdi. Sol qaǵidattardy jáne atqarylyp jatqan jumystar men qabyldanǵan zańdardy halyqqa jetkizip, olardyń mánin túsindirýde buqaralyq aqparat quraldary qyzmetkerleriniń róli zor», – dedi Máýlen Áshimbaev.
Senat jumysyndaǵy basym baǵyttardyń biri óńirlerdiń damýyna yqpal etý, sondai-aq, jergilikti ókildi jáne atqarýshy organdarmen birlesip ózekti problemalardy sheshý ekeni belgili. Osyǵan bailanysty Máýlen Áshimbaev buqaralyq aqparat quraldarynyń bolǵan oqiǵany jedel jáne obektivti jariialaýy, senatorlardyń depýtattyq saýaldary boiynsha siýjetteri men maqalalary, turaqty komitetterdiń qyzmeti men qabyldanyp jatqan zańdar týraly taldamalyq materialdary asa mańyzdy ekenine nazar aýdardy. Sondyqtan senatorlar BAQ ókilderimen bailanysty odan ári nyǵaitýǵa múddeli.
«Parlament osy sessiiada 100-ge jýyq zań qabyldady. Barlyq zań halyqtyń ómir súrý sapasyn arttyrýǵa, elimizdi odan ári damytýǵa jáne azamattarymyzdyń quqyqtaryn qorǵaýǵa arnalǵan. Osy rette áielderdiń quqyqtary men balalardyń qaýipsizdigin qorǵaýǵa, qoǵamdyq baqylaýdy arttyrýǵa jáne memlekettik satyp alý júiesin jetildirýge arnalǵan zańdardy erekshe atap ótken jón. Mańyzdy normalardyń qatarynda «Mass-media týraly» zań da bar. Bul qujat mass-media salasyndaǵy zańnamany júieli túrde jetildirýdi kózdeidi. Zań shyǵarý qyzmetimen birge Senat mańyzdy máselelerge arnalǵan Úkimet saǵattary, Parlamenttik tyńdaýlar, dóńgelek ústelder jáne halyqaralyq is-sharalar ótkizdi. Senatorlardyń óńirlerge saparyn da airyqsha atap ótken jón. Osy jumystyń bárine ózderińiz de qatysyp, olardyń mańyzyn halyqqa jetkizip kelesizder. Senat árdaiym buqaralyq aqparat quraldarymen tyǵyz bailanysta jumys isteidi. Aldaǵy ýaqytta osy bailanys odan ári artady dep senemin», – dep, Máýlen Áshimbaev BAQ ókilderine zor densaýlyq, baq-bereke jáne shyǵarmashylyq tabys tiledi.
Aita keteiik, biyl «Parasat» baiqaýyna qatysýǵa telearnalar, radio, gazet, aqparat portaldary jáne basqa da mediadan elimiz boiynsha 120-ǵa jýyq jumys kelip tústi.
2024 JYLǴY «PARASAT» BAIQAÝYNYŃ JEŃIMPAZDARY
Úzdik televiziialyq material: Aidarbek Balǵabekov – «24KZ» telearnasynyń Soltústik Qazaqstan oblysyndaǵy menshikti tilshisi, Fariza Bolatbek – «Atameken Business» telearnasynyń tilshisi.
Úzdik radiomaterial: Almas Baidrahmanov – «Qazaq radiosynyń» tilshisi.
Merzimdi baspasózdegi úzdik material: Eskendir Zulqarnai – «Egemen Qazaqstan» gazetiniń tilshisi, Ekaterina Bainiasheva – «Nash Kostanai» gazetiniń tilshisi.
Internet-basylymdaǵy úzdik jariialanym: Rýslan Ǵabbasov – «QazAqparat» halyqaralyq aqparat agenttiginiń tilshisi, Áigerim Ýmmat – «Informburo.kz» aqparat agenttiginiń tilshisi.
Áleýmettik jelilerdegi úzdik jazba: Bolat Buharbai – «Jaqsy Bolady» Youtube-arnasynyń avtor-júrgizýshisi, Abai Tilenshiev – «Abay Live» Youtube-arnasynyń avtor-júrgizýshisi, Renat Tashkinbaev – «Drýgie mesta» blogynyń avtory.
Jyldyń arnaiy syilyǵy – «Úzdik analitikalyq material»: Amangeldi Seiithan – «Qazaqstan» ulttyq telearnasynyń tilshisi, Arýjan Dáribai – «Tengrinews.kz» aqparattyq internet-portalynyń tilshisi, Laýra Túsipbekova – «Kazahstanskaia pravda» gazetiniń tilshisi.
