"Qazvodhoz" RMK Almaty filialynyń direktory Seiilhan Muhamadiev jemqorlyqqa qarsy is-qimyl Ulttyq biýrosynyń Almaty oblysy boiynsha departamentiniń terezesinen sekirip óldi. Bul aqparatty Ulttyq biýronyń baspasóz qyzmeti rastady, dep habarlaidy Sputnik Qazaqstan.
Oqiǵa 3 aqpanda bolǵan. Muhamadiev jedel tergeý is-qimyldarynan keiin Ulttyq biýronyń Almaty oblysy boiynsha departamentiniń ǵimaratyna jetkiziledi.
"Saǵat 09:02-da Muhamadiev departamenttiń tórtinshi qabatta ornalasqan qyzmettik kabinetiniń terezesinen sekirip ketti. Alǵan jaraqattarynan Muhamadiev sol jerde qaza boldy", — dep jazylǵan habarlamada.
Budan bólek jemqorlyqqa qarsy is-qimyl Ulttyq biýrosy "Qazvodhoz" direktorynyń ne úshin ustalǵanyn túsindirdi.
"Jemqorlyqqa qarsy is-qimyl Ulttyq biýrosynyń Almaty oblysy boiynsha departamenti prokýratýra organdarynyń sanktsiiasymen júrgizgen tergeý is-qimyldarynyń barysynda "Qazvodhoz" RMK Almaty filialynyń direktory S.M. Muhamadievtyń para alǵany anyqtaldy. 17,4 million teńge kólemindegi zańsyz syiaqyny nemese memlekettik satyp alýlar kelisimshartynyń 10 paiyzyn ol oryndalǵan jumystar týraly aktige qol qoiǵany jáne qosymsha kelisim úshin merdiger kásiporynnan aldy. Bul soma oǵan bir ai ishinde birtindep berildi. 2 aqpanda (saǵat 22:23-de) qalǵan 400 myń teńgeni alý kezinde Muhamadiev ustaldy", — dep habarlady baspasóz qyzmeti.
