Telejúrgizýshi Dinara Sátjannyń Late Night Show jobasyna qonaq bolyp kelgen Parij paralimpiada oiyndarynyń chempiony, paradziýdoshy Aqmaral Naýatbek memleket tarapynan belgilengen syiaqyny áli almaǵanyn aitty, dep habarlaidy Ult.kz.
Altyn medal ielengen parasportshy suhbat barysynda qandai syilyqtar alǵanyn tizbektedi. Eń aldymen Aqmaral Naýatbek týǵan jeri Jambyl oblysy Jýaly aýdanynyń ákimdigi 5 mln teńge kóleminde syiaqy bergenin atap ótti.
Odan keiin parasportshyǵa Astana qalasynyń ákimdigi 3 bólmeli páter syilaǵany belgili boldy. Biraq páterdiń kilti áli berilmegen.
«Páterdiń kilti áli berilgen joq. Qandai turǵyn úi kesheninen beriletini de belgisiz. Osy jyly beriledi dep úmittenemin», - dedi Aqmaral Naýatbek.
Odan bólek sportshyǵa 30 mln teńge berilgen.
Al altyn medal úshin memleket berilýi tiis 250 myń dollardy parasportshy áli almaǵanyn aitty.
«Jaqyn arada alamyz dep oilaimyn. Olimpiada men paralimpiada júldegerlerine bul syiaqy bir ýaqytta beriletin siiaqty», - dedi Aqmaral Naýatbek.
Aita keteiik, paralimpiada oiyndary 28 tamyz ben 8 qyrkúiek aralyǵynda Parij qalasynda ótken bolatyn.
