Tórt jyl ómirin túrmede ótkizgen Statistika agenttiginiń eks-tóraiymy Anar Meshimbaeva da para alyp isti bolǵan ózge áriptesterinen qalyspai, bostandyqqa shyqty, dep habarlaidy "Ult aqparat" 31-arnaǵa silteme jasap.
Eks-sheneýnik jazasyn Jaýǵashtydaǵy áielderge arnalǵan abaqtyda, al sońǵy 1 jyl bes aiyn Almatydaǵy qonys koloniiasynda ótepti. Aita keteiik, Anar Meshimbaevaǵa 2009 jyly Ulttyq sanaqqa bólingen 758 million teńgeni sybailastarymen birge jymqyrdy degen aiyp taǵylyp, 7 jylǵa sottalǵan bolatyn.
Halyq sanaǵyna bólingen 800 million teńge týraly áý basta sóz shyqqanda Anar Meshimbaeva «Qarjy politsiiasynyń bul deregi qatelik» dep júrip, bir kúnde quzyrly organdarǵa taptyrmai ketti. Shetelde úsh jyl tyǵylyp júrgen Statistika agenttiginiń burynǵy tóraiymyn arnaiy organdar Máskeýde tutqyndap, elge ákeldi. Alaida, izoliatorǵa qamalǵan kúnnen Meshimbaeva eshqaida qashqan joqpyn, aqsha urlaǵan joqpyn degeninen tanbady.
Sot barysynda onyń burynǵy orynbasarlary da, «Kiik» firmasynyń quryltaishysy Serik Turjanov ta basshylaryn qorǵap, túsinikteme berdi. Tipti Meshimbaeva isine BUU-daǵy áriptesteri de aralasyp, ony bosatý týraly Elbasynyń atyna hat joldaǵan bolatyn. Alaida, Meshimbaevanyń taǵdyryna munyń bireýi de arasha bolmai, sot ony 2014 jyly aqpanda jeti jylǵa sottap jibergen bolatyn. Osylaisha, eks sheneýnik úkimmen kelispegen kúii Jaýǵashtydaǵy áielderge arnalǵan túrmege qamalyp kete bardy.
Alaida, ózi siiaqty paramen isti bolǵan áriptesteri bostandyqqa shyǵyp jatqanda, Meshimbaeva da túrmede qarap otyra almai, qaita-qaita appeliatsiialyq shaǵym túsire bergen. Aqyry, abaqtydaǵy shendiniń úni Aqordaǵa jetip, prezident jarlyǵymen jazasy eki jylǵa qysqartylypty. Osylaisha, Anar Meshimbaeva búginnen bastap azattyqtyń aýasyn jutyp, Almatydaǵy qonys koloniiasynan bosap shyqty. Bes jylǵa deiin memlekettik qyzmetke jolai almaityn eks-shendiniń endi nemen ainalysatynyn eshkim bilmeidi.
