Nursultan Nazarbaevtyń tóraǵalyǵymen Qazaqstan Respýblikasy Qaýipsizdik Keńesiniń otyrysy ótti, dep habarlaidy Elbasy.kz.
Kezdesýde halyqtyń densaýlyǵy men ekonomikalyq qaýipsizdigin qamtamasyz etý máseleleri qaraldy.
Eń aldymen Qaýipsizdik Keńesiniń Tóraǵasy dárigerlerdiń, politsiia qyzmetkerleriniń, áskeri qyzmetkerlerdiń jáne koronavirýs infektsiiasymen kúresýge úles qosqan basqa da sala ókilderiniń janqiiarlyq eńbegin atap ótti.
Kezdesý barysynda Densaýlyq saqtaý ministri A.Tsoi qazirgi epidemiologiialyq qaýip-qaterlerge daiyndyq týraly baiandama jasady. Sonymen qatar, Qaýipsizdik Keńesiniń músheleri Ulttyq ekonomika ministri R.Dálenovtiń áleýmettik-ekonomikalyq damýdyń qazirgi táýekelderi men olardy aldyn alý sharalary týraly, sondai-aq Bilim jáne ǵylym ministri A.Aimaǵambetovtiń bilim berý protsesiniń turaqtylyǵyn qamtamasyz etý máseleleri týraly esepterin tyńdady.
Nursultan Nazarbaev jahandyq pandemiianyń «ekinshi tolqynyna» resýrstardy daiyndaý, aldyn-alýdyń keshendi sharalaryn ázirleý qajettigin, sondai-aq syrqattaný deńgeiin shynaiy baǵalaý men boljaýdyń mańyzdylyǵyn atap ótti.
– Daǵdarystan keiingi kezeńdegi damý boljamyn, qaýip-qaterler men múmkindikterdiń tujyrymdamalyq josparyn ázirleý qajet. Daǵdarystan keiingi kezeńdegi damý josparyn búgingi jaǵdailardy eskere otyryp, taǵy da pysyqtaý kerek. Biz pandemiiamen kúrestiń eń qiyn stsenariiine jáne onymen bailanysty qaýip-qaterlerge daiyn bolýymyz kerek, – dedi Qaýipsizdik Keńesiniń Tóraǵasy.
Sonymen birge, kezdesý barysynda quqyq qorǵaý organdaryna qylmystyq ahýaldyń nasharlaýyna jáne qylmystyń ósýine jol bermeý, sondai-aq aldyn alý sharalaryn ázirleý tapsyryldy.
– Halyqty azyq-túlikpen jáne dári-dármektermen úzdiksiz qamtamasyz etý, áleýmettik mańyzy bar taýarlardyń baǵasy men tarifterdi negizsiz ósirýge jol bermeý úshin tiisti sharalar qabyldaý mańyzdy. Sondai-aq, jylytý maýsymyna sapaly daiyndyq jasap, basqa da ózekti strategiialyq máselelerge kóńil bólý kerek, – dep qorytyndylady Qaýipsizdik Keńesiniń Tóraǵasy.
