«Aq jol» demokratiialyq partiiasy fraktsiiasynyń depýtattary pandemiiadan zardap shekken shaǵyn jáne orta biznesti 6 paiyzben qaita qarjylandyrýdy talap etti, dep habarlaidy "Ult aqparat".
«QR Prezidenti osy jyldyń 1 qańtaryndaǵy Joldaýynda «ekonomikanyń zardap shekken sektoryndaǵy shaǵyn jáne orta biznestiń barlyq qoldanystaǵy kreditteri boiynsha jyldyq 6 paiyzdyq mólsherlememen memlekettik sýbsidiialaýdy qamtamasyz etý qajet« degen bolatyn. Sonymen qatar Prezident bul maqsatqa qsoymsha 200 mlrd teńge bólinetindigin, al sýbsidiialaý baǵdarlamasynyń jalpy kólei 800 mlrd teńgege jetkiziletindigin habarlaǵan edi. Bul tapsyrma kásipkerlik qoǵamdastyq arasynda úlken rezonans týdyrdy», - dedi Premer-Ministr Asqar Maminniń atyna depýtattyq saýal joldaǵan Azat Perýashev.
Májilis depýtatynyń dereginshe, tikelei pandemiiadan jáne onymen bailanysty sharalardan 1 millionan astam kásipker zardap shekti. Bul elimizde tirkelgen biznes sýbektileriniń úshten ekisin quraidy.
Tótenshe jaǵdaiǵa jáne lokdaýn shekteýlerine bailanysty 430 myńnan astam kásipker jumysyn toqtatyp, onyń basym bóligi áli kúnge deiin qyzmetin jandandyrǵan joq. Ásirese kólik, saýda jáne qyzmet kórsetý, qoǵamdyq tamaqtaný, qonaq úi biznes, jyljymaityn múlikpen bailanysty operatsiialar salalary úlken shyǵynǵa batty.
Alaida Memleket basshysynyń tapsyrmasyna sáikes elimizdiń barlyq óńirlerindegi shaǵyn jáne orta biznes sýbektileriniń kreditterin qaita qarjylandyrý júrgizilmei otyr.
«Osyǵan orai biz Úkimetten, Ulttyq bankten jáne QR Qarjy naryǵyn retteý jáne damytý agenttiginen zardap shekken barlyq shaǵyn jáne orta biznestiń kreditterin 6 paiyzben qaita qarshylandyrýdy shuǵyl, kidirtpesten bastaýdy ótinemiz. Sonymen qatar Prezident Joldaýynyń oryndalýyn sóz buidaǵa salǵan laýazymdy tulǵalardy anyqtap, jaýapkershilikke tartýdy suraimyz», - dedi Azat Perýashev.
