Tanymal akter Almat Saqatov balalarǵa beriletin járdemaqyny otbasynyń áleýmettik jaǵdaiyna qarai taǵaiyndaý máselesine qatysty pikir bildirdi. Óner iesi jańa tártip tóńiregindegi túsiniksiz jaittardy ázil arqyly jetkizdi, dep habarlaidy ult.kz.
Akter áleýmettik jelidegi paraqshasynda azamattardy áleýmettik jaǵdaiyna qarai toptarǵa bólý máselesin kóterdi. Ol óziniń otbasylyq jaǵdaiyn mysalǵa keltirip, járdemaqy taǵaiyndaý tártibine qatysty saýaldaryn ortaǵa saldy.
"Qyrylyp jatyrmyz mine, A, V, S, D, G grýppasy dep. Áielimiz ekeýmiz bylai-bylai shyqqanda, onyń jalaqysy menen kóp. Bizdiki az endi. Men endi G grýppasymyn. Maǵan tiyn-teben berip turyńdar deimin. Keshe toiǵa baramyn dep aqsha alyp edim, aiaq astynan A grýppasy bolyp shyǵa keldim. Áielim posobie almaisyń deidi. Men nege almaimyn? Úidiń tirligin, syrttyń tirligin jasaimyn. Úide otyrmyn ǵoi endi. Myna grýppalardy túsindirińdershi ózi", – dedi Almat Saqatov.
Óner iesi tabys kólemine bailanysty otbasynyń áleýmettik sanaty ózgerýi múmkin ekenin ázilmen sipattaǵan. Sondai-aq ol úi sharýasymen ainalysatyn adamnyń eńbegi qalai eskeriletinine qatysty suraq qoidy.
Akterdiń bul jazbasy áleýmettik jelide qyzý talqylandy. Kópshilik onyń kótergen máselesin qoldap, áleýmettik qoldaý júiesindegi ózgerister halyqqa túsinikti tilmen jetkizilýi kerek ekenin aitty.
"Ne bolsa da, ashy shyndyqty jetkizdi", "Túsinbei qaldyq qoi sol, alsyn endi ony da, kóp kórdi", "Kúshti jetkizdińiz", "Aldaǵy ómir shyndyǵy osyndai bolady endi, masqara", "Ózi bir-aq ret beriletin ómirde halyqtyń ár jaǵdaiyn bólgenderi nesi?" – dep pikir qaldyrdy jeli qoldanýshylary.
Osylaisha, Almat Saqatovtyń ázil aralas málimdemesi áleýmettik járdemaqylardy taǵaiyndaý tártibi men azamattardyń tabysyn baǵalaý máselesine qatysty pikirtalas týǵyzdy.
Almat Saqatov kim?
Almat Saqatov – qazaqstandyq teatr jáne kino akteri, ázil-syqaq janrynda tanylǵan óner iesi. Ol Shyǵys Qazaqstan óńirinde dúniege kelgen. Ákesi Marat Saqatov – belgili akter, rejisser ári "Tamasha" teatrynyń negizin qalaýshylardyń biri. Almat Saqatov bala kezinen ónerge qyzyǵyp, ákesiniń jolyn jalǵastyrǵan. Shyǵarmashylyq jolynda "Baýyrjan shoý" ázil-syqaq teatrynda óner kórsetip, kópshilikke keńinen tanyldy.
Keiin otandyq filmder men telehikaialarǵa túsip, komediialyq jáne dramalyq keiipkerlerdi somdady. Akter "Kózaiym", "Ótkinshi jańbyr", "ToiHana" jáne basqa da ekrandyq týyndylarǵa qatysqan.
Ol bir kezeńde "Qazaqstan" ulttyq telearnasyndaǵy "Tańsholpan" baǵdarlamasynyń júrgizýshisi boldy. Almat Saqatov tikelei efirde jumys isteýdiń jaýapkershiligi joǵary ekenin suhbattarynda atap ótken. Óner iesi Almatyda akterlerdi daiyndaityn ázil stýdiiasyn ashyp, jas talanttardyń shyǵarmashylyq qabiletin damytýǵa atsalysqan. Sondai-aq elimizdiń ár óńirinde gastroldik saparmen óner kórsetken.
2020 jyly "Almaty" telearnasyna bergen suhbatynda akter ónerdi ómiriniń ajyramas bóligi dep atady. Almat Saqatov otbasyly, balalary men nemereleri bar. Ol suhbattarynda otbasylyq qundylyqtar, bala tárbiesi jáne shyǵarmashylyq jolyndaǵy qiyndyqtar týraly jii áńgimeleidi. Búginde akter kino salasyndaǵy qyzmetimen qatar, áleýmettik jelide qoǵamdaǵy ózekti máselelerge qatysty pikir bildirip júr.
