Qazaqstan qurylysshylar odaǵy tóraǵasynyń orynbasary Serikjan Mergenbaev eldegi tótenshe jaǵdai kezinde Úkimet tarapynan qurylys salasy boiynsha qabyldanǵan sharalarǵa qatysty óz pikirimen bólisti, dep habarlaidy QazAqparat.
«Keńeitilgen otyrysta kóterilgen máselelermen ony sheshýdegi Memleket basshysynyń usynystary ornyqty dep oilaimyn. Iá, Prezident biraz bilik basyndaǵylarǵa eskertý jasap, jumystaryna syn aitty. Jáne problemalardy sheshý úshin Úkimetke 2 apta ýaqyt bergeni de ádil sheshim dep oilaimyn. Sebebi Prezident pandemiiamen kúreske tiisti qarajattyń ýaqytyly bólinip, degenmen quzyrly mekemelerdiń der kezinde naqty sharalar qabyldamaǵandyǵyn basa aitty. Ol qatelik búginde tótenshe jaǵdaidyń ekinshi kezeńine alyp kelip, qaita karantin júiesin ornatýǵa ákelip otyr. Al biznes ókilderi óz tarapynan halyq aldyndaǵy áleýmettik jaýapkershilikti sezinip, jumysshylardy qysqartpai, jalaqysyn tólep qoldan kelgenshe jaǵdai jasap otyr. Degenmen bylai úzdiksiz jalǵasa berýi múmkin emes, biznesti odan ári damytý úshin paida, túsim bolý kerek», - dep óz oiymen bólisti S. Mergenbaev.
Onyń aitýynsha, Memleket basshysynyń biznes ielerin ýaqytsha salyqtan bosatý sátti ideia jáne osy sala ókilderi úshin aitarlyqtai qoldaý boldy.
«Óz salam boiynsha aitar bolsam. Qurylys salasynda memlekettik satyp alý týraly zań jobasyna ózgerister engizildi. Sonyń negizinde buryn memlekettik satyp alý protsesi 2-3 aiǵa sozylatyn bolsa, qazir nebári 7 kúnniń ishinde sheshim shyǵady. Pandemiia kezinde memlekettik satyp alý protsesiniń ońtailandyrylýy qurylys salasyndaǵy tiimdi sheshim bolyp otyr. Jáne árbir qurylys kompaniiasy óz shama-sharqyna qarap qurylys nysandaryn salýǵa ótinim beredi. Bul jerdegi bir aityp ótetin másele atalǵan zańnamalyq ózgeris osy jyldyń tamyz aiyna deiin ǵana jaramdy. Osy oraida bizdiń odaq Memleket basshysyna jyldyń sońyna deiin sozý týraly úndeý joldadyq. Prezidentke úndeý joldamas buryn elimizdiń barlyq óńirlerindegi qurylysshylar arasynda saýalnama júrgizip olardyń pikirin bildik, nátijesinde qurylys salasyndaǵy memlekettik satyp protsesine engizilgen jańa tártipti jyldyń sońyna deiin uzartý týraly ótinish bildirýge bir aýyzdan kelistik. Úndeýimiz óz nátijesin beredi dep úmittenemiz», - dedi ol.
