«Aq jol» partiiasy tóraǵasynyń orynbasary, Májilis depýtaty Berik Dúisembinov aýyl ákimderin sailaý júiesin bekitý týraly Memleket basshysynyń tapsyrmasyna qatysty pikir bildirdi, dep habarlaidy "Ult aqparat".
«Bul másele búgin ǵana kóterilip otyrǵan joq. Aýyl ákimderin sailaý týraly bastamanyń ózine 7-8 jyl bolyp qaldy. Qazirgi aýyl ákimderin sailaýshylar – máslihattar. Prezidenttiń berip otyrǵan tapsyrmasy men qoldanystaǵy aýyl ákimderin sailaý júiesiniń arasy jer men kóktei desek bolady. Mysaly, qazir aýyldyń ákimi bolyp kim sailanyp jatyr? Máslihattyń usynǵany, aýdan ákiminiń aidaýyna júretin, zeinetaqyǵa shyǵyp qalǵan nemese ómirlik tájiribesi az azamattar búgin de aýyldardy basqaryp otyr. Al, endi bolashaqta Prezidenttiń berip otyrǵan tapsyrmasy qandai? Ol sol aýylda turatyn, óz aýylyn kórkeitýge múddeli, jany ashityn azamattar aýyldarǵa sailanýy kerek», - dedi Berik Dúisembinov búgin OKQ-da ótken baspasóz máslihatynda.
Depýtattyń aitýynsha, pandemiia aýylǵa kimniń janashyr ekenin kórsetip bergen.
«Aýylǵa dári-dármek pen tamaq tasyp, aǵaiynnyń ómirin alyp qalyp jatqan – sol aýyldyń azamattary. Biraq olardyń kópshiligi ákimdikke sailaý kezinde ótpei qalǵan azamattar. Óitkeni resmi túrde biraz shekteý bar. Sebebi sol aýylǵa jany ashityn, óresi keń azamattar belgisiz sebeptermen ótpei qalady. Sol úshin halyq aýyl ákimderine senimsizdikpen qaraidy. Sondyqtan naǵyz eldiń azamatyn sailaý úshin - ádil sailaý bolýy kerek», - dedi ol.
Berik Dúisembinov táýelsiz aýyl ákiminiń aýdan nemese oblys ákimderimen kelispeýshiligi bolýy múmkin ekenin aitady.
«Osy máseleni sheshý kerek. El sailaǵan ákimdi eshqandai ákim jumystan shyǵaryp tastai almaidy. Ádil sailaýmen myqty azamattardy alar bolsaq, sapaly ult bolýǵa qol jetkize bastaimyz. Aýyldy tek attap ótetin baspaldaq retinde paidalanatyn adamdar kelmeýi kerek. Halqymyzdyń jartysy aýylda turady. Aýyldardyń ereksheligin eskere otyryp, azamattardy ádil sailaýymyz kerek», - dedi ol.
