Reseide keibir qyzmetkerler ózderine jaqpaityn basshylar men áriptesterinen qutylý úshin ezoterikalyq tásilderge júgine bastaǵan. Ozon marketpleisinde adamdy jumystan ketirýge arnalǵan siqyrly shamǵa suranys artyp keledi, dep habarlaidy ult.kz.
Shópter qosylǵan balaýyzdan jasalǵan buiym jumys ornynda janjal shyǵaryp, túrli intrigaǵa baratyn nemese únemi baqylaý júrgizetin adamdardan arylýǵa kómektesedi dep jarnamalanǵan. Marketpleistegi málimetke sáikes, shamnyń baǵasy – 687 rýbl.
Ónimdi ázirleýshiler shamdy arnaiy rásimderge arnalǵan qural retinde usynady. Sipattamada onyń qoldan jasalatyny jáne sheber tarapynan aldyn ala belsendiriletini jazylǵan. Jarnamalyq bannerde rásimniń keri jaǵymsyz saldary bolmaityny aitylyp, jalyn energiiasy qajetsiz adamnyń qyzmetinen ketýine yqpal etedi degen tujyrym keltirilgen.
Marketpleistegi kórsetkishter de taýarǵa qyzyǵýshylyq joǵary ekenin ańǵartady. Shamnyń reitingi 5 baldyń 4,9-yn quraidy. Ol shamamen 18 myń baǵa alǵan. Pikirler bóliminde satyp alýshylar ónimdi qoldaný tájiribesimen bólisip, áriptesterine qatysty ótkizgen rásimderi týraly jazǵan.
Satyp alýshylardyń biri ózine jaqpaityn áriptesiniń fotosýreti aldynda jeti kún boiy arnaiy rásim jasaǵanyn aitqan. Onyń sózinshe, duǵaǵa uqsas mátindi oqyǵan kezde sýret japsyrylǵan qaǵaz jylyna bastaǵan.
«Maǵan kedergi keltiretin áiel qazir tynyshtaldy. Bir jylǵa jýyq ýaqyt boiy meniń emotsiiammen qorektenip kelgen edi, al qazir aýrýhanaǵa ketip qaldy. Rásimdi oǵan jamandyq jasaý úshin emes, ózimdi qorǵaý úshin bastadym», – dep jazǵan satyp alýshylardyń biri.
Alaida shamnyń adamdy jumystan ketirýge yqpal etetini týraly málimdemeler satyp alýshylardyń jeke pikirlerine negizdelgen. Onyń mundai áseri ǵylymi turǵydan dáleldenbegen.
