Óziniń Astanasyn árbir qazaq, qorǵasyn eki kózdiń qarasyndai...

Eki kún boiy Astana qyzý jyr dodasyn tamashalady. Bir-birinen kem túspeitin 20 aqyn alamanǵa tústi. Mádeniet jáne sport ministrligi uiymdastyrǵan halyqaralyq aitys Elordamyzdyń 20 jyldyǵyna arnaldy. Eki kún boiy aqyndar ásem qala Astanasyn jyrǵa qosty. Aitysqa Qyrǵyzstannan, Mońǵoliiadan aqyndar keldi. Bul aitysta bári aityldy. Qoldaý da, Joldaý da, shuraily tirkes pen ádemi uiqas ta boldy.

Bul aitys burynǵyǵa uqsamai­dy. Uqsamaityn da jóni bar. Talai dodalarda baq synaǵan has júi­rik­­ter kórermeniniń aldyn­da qy­­zyl kilemmen júrip ótti. Qa­­­­zylar alqasyna da sóz máie­gin uǵatyn qalamgerler jiyl­ǵan.

Mádeniet jáne sport vitse-ministri Aqtoty Raiym­qulova ministrdiń alǵysózin oqyp berdi. Mi­­nistr: «Aitys – ha­lyq asyǵa kútetin, jo­ǵary baǵa­lai­tyn ulttyq ónerimizdiń biri. Dodada elimizdiń túkpir-túk­pi­ri­nen, shet elderden kel­gen ot aýyzdy, oraq til­di aityskerlerimiz óz ba­ǵyn synaidy. Bar­shańyz­dy jyr-báigeniń ashylýymen quttyqtap, aitys­ker­lerge sáttilik tileimin», – dep tilek bildiripti.

Eki eldiń arasyn jalǵaǵandai

Birinshi kún...

Kúni buryn tartqan jerebe boiynsha al­ǵash bolyp sahnaǵa Rinat Zaiytov pen Meiir­bek Sultanhan shyqty. «Kári qaiyń men jas sańlaqtyń» aitysy syilastyqqa quryldy. Astanalyq aqyn semeilik seriniń arynynan barynsha saqtanyp aitysty. Óitpei qait­syn, Rinat bul aitysta aitys jasaýdan góri, mysynyń basym ekenin dáleldeýmen boldy. «Men bilgen Rekeń qashannan da. Halyqty shoý kórsetip shýlatyp ed» dep Meiirbek ai­ty­­synyń ataýyn ózi qoidy. Rinattyń ai­tysqa kóp shyqpaitynyn aita kele, «Jo­ǵal­ǵan jolbarysty taýyp bergen, Ministr Arys­tanǵa myń raqmet» dep jón teńeý bil­dirdi. «Búgin qandai tosyn syi alyp keldiń, Óziń jaqsy kóretin elordaǵa» degenine, «As­tana – meniń jalǵyz mahabbatym, Kedeidiń toi­ǵa kier shapanyndai» dep Rinat dóp jaýap berdi. Qysylańqyrap otyrsa da, ótimdi jyr aitqan Meiirbektiń upaiy túgel boldy. Barynsha aitam degen Rinat bir toǵyzben kem qaldy.

Ádilbek Búrkitqazy men Mýndýzbek Ýsýp­be­kýýly qyrǵyz ben qazaq aitysynyń jara­sym­dy úlgisin kórsetti. Aiyr qalpaq aǵaiyn­nyń ahýaly men eki el arasyndaǵy dostyq jaiyn sóz etti. Manas shyńy men Alataýdan án ketpesin degen tamasha tilek te aityldy. «Eki elge bilesiń aitys ortaq, eki eldiń ara­syn jalǵaǵandai» dep halyqaralyq aitystyń mańyzyn jyrǵa qosty. Degenmen aitys shyraiynyń kirýi qarsylasqa da bailanysty. Halyq «Ádilbek alysqa shabatyn bala eken» dep baǵasyn berdi.

Mońǵoliiadan kelgen Amanjol Qýantqan men Serik Qoishuǵylovtyń aitysy baýyr­lar­dyń birin-biri demegenin kórsetti. Serik Aman­jolǵa «Elge kel, jaqsylyqtyń kóshin bas­ta» dep saýal tastasa, «Alla qalasa, ol kún­de alys emes dep» Qýantqan eldi bir qýan­typ tastady. Seriktiń batys minez maqamy Melsterdi sahnaǵa qaita ákelgendei áserge bóledi. Maqsat Aqanov pen Aiaýlym Juma­bek­qyzy qyz ben jigit aitysynyń kórigin qyz­dyrdy. Munan buryn da talai qyzdy sah­nada tolqytqan Maqsat Aiaýlymnyń da adýynyn baiqap kórdi. Aqanovqa jarasar ázil men Aiaýlym kórsetken iba jurtty tánti etti. Kelesi bolyp aitys alańyna shyqqan Birjan Baitýov pen Asylbek Maratov biraz sharpysyp qaldy. Qazaq pen qyrǵyzdyń artyqshylyǵyn aityp biraz jerge barysty. Kóp ótpei, syilastyq jarasym tapty. «Qiia­met kúni týyp kelgeninshe, araǵa tilmash sal­mai tildeseiik» degen Birjan aqyn Asyl­bek­pen aitysyna ádemi núkte qoidy.

Alty qurlyqqa Alty Alash,
Senimen málim, Astana!

Ortaǵa Aibek Qaliev pen Didar Qamiev shyq­ty. Bir qyzyqtyń bastalaryn ishimiz se­zip otyrdy. Aqyndar aitysty tarihi jyr­larymen kórkemdep, ázil aralas unamdy ai­tys jasady. Bir-birine oryndy syn aityp, laiyqty jaýap berdi. Jerebe tartý rásimine kel­mei qalǵan Didarǵa: «Kórshiniń qyzy qu­sap qoi kelgende, keste tigip jatqanyń qyzyq bol­dy» dep Aibek inisiniń betasharǵa qatys­qanyn synǵa aldy. Tosylmaǵan Didar: «Qy­ryq­taǵy Qaliev renjidi dep, seksendegi ájem­di attap kete almadym» dep ýádeli jerge barǵanyn baiandady. «Aqshasyn qimaǵannan emes aǵa, aq shashyn syilaǵannan kete alma­dym» kelisti teńeýmen kópke unady. «Moń­ǵo­liia men qyrǵyzdyń aqyndary senen erte kel­di» degenine, «Samoletpen ushqam joq siz se­kildi, gololedten ushyp kete jazdap keldim» dep jurtty qyran-topan kúlkige qaldyrdy. Ai­bektiń san qyryn jyrǵa qosyp: «Qur áń­gime aitqanda ziianyń joq, problema ait­qan­da tym qaýipti eń» dep aǵasyna baǵa berdi. Qa­liev ta Qamievtiń kóńilin qaldyrǵan joq. Oryn­dy tustan shabýyldaityn strateg eke­nin kórsetip, jaimen jyrlady. Ár sózimen baiypty jyr órdi. Astana mańyndaǵy aýyl jaǵ­daiyn, kómir baǵasyn, gaz ben otyn-sý­dyń máselesin qozǵady. Mándi aitys Di­dar­dyń Astana jaily oily tolǵaýymen túiin­deldi.

– Áz Táýke deiin handardyń,
Ordasynan ozǵan, Astana!
Jeti Jarǵydai zańdardyń,
Jalǵasyn jazǵan, Astana!
Alty qurlyqqa Alty Alash,
Senimen málim, Astana!
Atasy basqa jurtqa da,
Jamaǵaiynsyń, Astana!
Soǵysqan eki ultqa da,
Araǵaiynsyń, Astana!
Ataq pen dańqy áp-sátte,
Joǵarylai ketken, Astana!
Álihandarym armandap,
Kóre almai ketken, Astana!
Batpaq pen sordyń ústine,
Shańyraq qurǵan, Astana!
Sorda turǵanymen qazaqtyń,
Baǵy bop turǵan, Astana!
Babanyń jolyn jalǵaǵan,
Shyrqaldy qaita arman-án!
Azattyǵyńnyń kóginde,
Qyran qusyń bar samǵaǵan,
Osynaý azat kúnimnen,
Dinimnen, ana tilimnen,
Aiyrmashy dep tileimin
Jaratqan jalǵyz Alladan!

Ájesiniń «qarǵysy», 
atasynyń alǵysy

Rústem Qaiyrtaiuly men Muhtar Niiazov qurdas-qaljyńǵa qurylǵan aishyqty aitys jasady. Birin-biri ilip áketip, shappa-shap aitys qurdy. Taban astynda qoiylǵan suraq pen lezde berilgen jaýap ereksheligimen este qaldy.

«Apamnyń balasy edim Astanany, 
Apamsha jaqsylap bir qarǵaiynshy»

degen Rústem:

–It tumsyǵy mańaiy, 
Orman bop ketkir, Astana! 
Qoiandynyń mańaiy,
Joldar bop ketkir, Astana!
Nóser quisa da kóshege, 
Sý jinalmaǵyr, Astana!
Muń menen zary qazaqtyń, 
Mýzeide qalǵyr, Astana! 
Kómirdi berip aýylǵa, 
Gazy tez kelgir, Astana! 
Ton kigizbei mamyrda, 
Jazy tez kelgir, Astana! 
Abý-Dabii aspandap, 
Jana bermegir, Astana, 
Qoqysta jatar ińgálap,
Bala kórmegir, Astana!
Jataqhanadaǵy jastardyń,
Páteri bolǵyr, Astana!
Sol páterinde on-on bes, 
Bópeli bolǵyr, Astana! 
Qarǵaidy seni osylai,
Qara kempirdiń balasy», – dep ádemi jyr shýmaǵyn arnady. Muhtar bolsa:

«Qara kempir balasyn aityp jatsyń, 
Ol da bolsa oiyńnyń shalasy ǵoi. 
Nemeresi sekildi erkeletken, 
Elorda – Elbasynyń qalasy ǵoi. 
Ájeńniń áńgimesin aita berme, 
Astana – atasynyń balasy ǵoi»,– dep ázilmen jaýap qaiyrdy.

Aidos Rashat pen Erjan Ámirov aitysy da sahnaǵa shyrai berdi. Ospandar oqqa keýde tósegen ǵoi, qazaqtar qazaq bolyp qalý úshin» deitin Aidostyń jyr joldary kórermenge rýh berdi. Erjan aqyn qazaq astanalarynyń tarihyna úńilip, jańa Astananyń kóz tartar sulýlyǵyn jyrǵa qosty.

– Kerei men Jánbektiń zamanynda, 
Áspettelgen qazaqtyń shar qalasy. 
Alashtyń azamattary qyzmet qylǵan, 
Syr eli alty Alashtyń arly anasy. 
Almatydai sap bergen alyp shahar, 
Qonaevtai qazaqtyń er, darasy.
Astana Nur aǵamnyń qoltańbasy, 
Bas qosqan bar álemniń han-qarasy.
Máńgilik el bolamyz dep jatyrmyz, 
Buiyrsa bolashaqqa baǵdar osy. 
Qazaq eli máńgilik bolmai qaitsyn?
Bir qaladan sap berse ár balasy.

Aitystyń jas tolqyny Arýna men Didar qyz-jigit aitysyn jasasa, Aspanbek pen Shuǵaiyp úzeńgilesterdiń bir-birinen qara úzbeitinin dáleldedi.

«Ai men aspannyń» tartysy

Ekinshi kún...

Aitystyń ekinshi kúni 12 aqyn alamannyń kórkin qyzdyrdy. Shetinen «sen tur, men ataiyn» deitin kil myqtylar. Kórermen de qaisysy qara úzip shyǵar eken dep, yntyǵyp otyr. Bári de – «kil júirikte kim júirik» dei­tindei emes, talai dodalarda shashasyna shań juqtyrmaǵan naǵyz júirikter. Bir kún buryn­ǵy dodada airyqsha óner kórsetken aqyndardan da airyqsha aitys kútetini ras. 12 aqyn, 6 jup. Jerebe tastalyp, juptary anyqtalyp qoiǵan. Qaisysy kimmen shy­ǵatyny da anyq. Bir-biriniń qyr-syryn da jaqsy biledi.

Sonymen, alǵashqy ainalym. Sahna tórine aitystyń aqtańgeri Aibek Qaliev pen pavlodarlyq júirik Aspanbek Shuǵatai shyqty. Biri – has júirik, ekinshisi – jas peri. Aqyndardyń tilimen aitqanda «Ai men aspannyń» sóz qaqtyǵysy. Aqtańgerdiń aiaq alysy belgili, aspai-saspai, bappen aitysatyn Aibektiń maqamyna kórermen de úirengen. Al tókpe jyrdyń sheberi Aspanbek te qarsylasynan qalyspaityny anyq.

– Ǵasyrdaǵy ǵalamat sheshim boldy,
Arqaǵa Astanany kóshirgeni.
Irgetasy quiylyp eń alǵashqy,
Kirpishtiń qalanǵany esimde edi.
Sodan beri jiyrma jyl ýaqyt ótti,
Zymyrap ýaqyttyń kóshi ilgeri.
Astana sáýletinen sáýle shashyp,
Kórkińmen kóz qýantyp, ós ilgeri.
Elordam – qazaǵyma qutty meken,
Ulys pen ulttyń uly kóshindegi.
Astanam – tarih tartqan altyn alqa,
Aiaýly anam Alashtyń tósindegi, – dep áýezdi sóz bastaǵan Aibek aqyn Astananyń 20 jyldyǵyn erekshe jyrlap ótti.

Qashanda eldiń muńyn, kóptiń kóńilinde júrgen oiyn ashyq aitatyn arqalyq aqyn bul joly ol taqyryptan ainalyp ótpedi. Ar­qa­daǵy aǵaiynǵa saýyn aita otyryp, til­diń, aýyldyń muńyn muńdap, joǵyn joqtady.

– Soltústik Táshenovke qaryzdarmyz,
Azattyq dep shyrqasaq, asqaq ándi,
Jumabek Táshenovter bolmaǵanda, 
Qai jerge salar ediń astanańdy, – dep Táshenovtiń erligin de tilge tiek etti.

«Seniń atyń Aspanbek, men – Aibekpin,
Ai men aspan qashanda jarasady» dep qar­sylasyn da ádemi qaljyńmen demep jiberdi.

Aspanbek te qarsylasynyń sózin ilip áketti.

– Qushaǵyna aspannyń, Ai da syiyp ketedi,
Kún de syiyp ketedi.
Jer de syiyp ketedi.
Mynaý otyrǵan qaimana,
El de syiyp ketedi» dep sóz bastaǵan aqynǵa Aibek Qaliev:

«Ai men kúni, juldyzy bolmasa eger,
Aspan degen qap-qara túnek qana» dep ádemi ýájin jetkizdi.

Júiriktiń aty – júirik. Aqtańgerdiń aty árdaiym oza shabatyny bar. Bul joly da Ai­bek aqyn qarsylasynan ozyq ekenin kórsetti.

Bozoqtyń tamyrynan gúldep shyqqan,
Jasasyn, Astanadai azat qala!

Qaraǵandylyq Maqsat Aqanovtyń ózine tán erekshe áýezi bar. Ásirese, qyz ben jigittiń aitysy dese, Maqsat aqynnyń jany kiredi. Árdaiym aqyn qyzdarmen dodaǵa jii túsetini de sondyqtan bolsa kerek. Bul joly aqynǵa shyǵysqazaqstandyq Rústem Qaiyr­taiuly tap kelipti. Rústem de «ońai shaǵyla qoiatyn jańǵaq» emes. Á degennen Rústemniń:

– Shynymenen, erkekpenen shyqtym ba dep,
Jaqtyrmai qarap turǵan vzgliadyn-ai, – dep qaǵytqany da sondyqtan.

Maqsattyń da qaǵytpasy daiyn turatyny belgili. Ol da utymdy sóz, ýytty qaljyńmen qarsylasyn túirep ótti.

–Qalaisyń, Rústemdei qaqiǵanym,
Saqasy iýmor menen satiranyń.
Kele salyp keskinin aityp jatsyń,
Keshegi aitystaǵy oqiǵanyń.
Kerek bolsa, alyp keldim dep qoiady,
Aiaýlymnan tappaǵan materialyn, – dep ózine jarasymdy ázilmen bastady.

«Abylaidyń armany bylai tursyn, tilegi oryndaldy Tursynbektiń», «Qudai-aý, adam túgil qoshqary da, buzyla bastaǵan ba bul zamannyń», «Domalaq dúniede tasy órge, domalap turǵan halyq biz ǵanamyz», «Áldiniń álsizge kep, kúsh kórsetý, álimsaqtan kele jatqan ýaiym-qaiǵy», «aspanda da, jerde de ádildik joq, álemniń ár buryshy moiyn­daidy», «aspandaǵy torǵaiǵa lashyn ýaiym, teńizdegi balyqqa jaiyn qaiǵy», «bes kúnde birligińe berik bolsań, eshkim de eldigińnen aiyrmaidy», «ózimizde óndirgen shikizatpen, ózimizde biteiik kemimizdi» dep tolǵatsa, Maqsat aqyn: «qazaqtyń aitys deitin ǵurpy barda, ár sóziń júk bolady-aý, shirkin narǵa», «janashyr sendei inim kóp bolsa eken, jalǵyz bop júrgen joqpyn jurtym barda», «unjyr­ǵasy túspeidi bul aǵańnyń, ulym joq bolsa-daǵy, ultym barda», «onsyzda el edik ǵoi, az-aq qana, qazaqqa jany ashidy qazaq ǵana», «Bo­zoqtyń tamyrynan gúldep shyqqan, Jasa­syn, As­ta­nadai azat qala» dep jyr-marjanyn ter­di.Úshinshi ainalymǵa atyraýlyq aqyn Serik Qoishyǵulov pen qyrǵyz aqyny Asylbek Maratov shyqty. Eki aqyn «Súiinbai men Qataǵannyń» jyryn jalǵap, ádemi aitys úlgisin jasady.

Elordam – qazaǵyma qutty meken

Odan keiingi kezek Meiirbek Sultanhan men Shuǵaiyp Sezimhanǵa berildi. Meiirbek aqynnyń mádenietti sóz saptasy, sabyrlybolmysy, eshkimge uqsamaityn erek beinesi kórermenin jaýlap alǵaly qashan?! Meiirbek aqyn dese, el eleń etpei tura almaidy. Aqyn­­nyń kesek-kesek sózderi, oily oralym­dary árdaiym kóptiń esinde júredi. Bul joly qurdas eki aqyn bir-birin sózben qaǵy­typ qana qoimai, kósheli sóz aityp, kóptiń kóńilinen shyqty. Meiirbek aqyn «Aitys aqyn­dary men jyrshy-termeshilerdiń» ha­lyq­aralyq odaǵynda orynbasar bolyp qyz­met atqaratyn qurdasyn sózben túireýdi de umytqan joq. Magistratýra túsip, bilim al­ǵan Meiirbekke «rektordyń tilin taýyp, oqýǵa túsip aldyń ba?» dep qaǵytpaq bolǵan Shuǵaiyp. Aqynnyń da aitar sózi daiyn eken:

– Ózennen ótý úshin ótkeldi izde, 
Óte almasań, bolmasyn ókpeń bizge. 
Kele salyp, kózińdi alarttyń ǵoi, 
Kóterilip ketkendei kóktem-kúzde, 
Rektordyń eshqandai qatysy joq,

Granttyń máselesin retteýimizge,
Áiteýir aǵylshynsham senen jaqsy,
Shet tilinen bolǵan joq, shekteý bizge.
Meiirbektiń: «Sheneýniktiń barlyǵy jinalǵanmen, Sheraǵamnyń oryny oisyrap tur», «Jerge qarap turmai qaitsin endi, urpaǵy úshin uialǵan qairan Abai», «Elbasy muǵalimder mártebesin, nazarǵa Joldaýynda ilgen joq pa?», «Ustazdar qaǵazbasty bop ketkenin, ashyp aityp, ashýǵa mingen joq pa?», «onsyzda sol mektepte ustazdardyń, kóz jastary kól bolyp, júrgen joq pa?» degen otty tirkesterimen kóptiń kókeiinde júrgen kóp túitkildi ortaǵa saldy.

Eki aqynnyń tartysynda Meiirbek Sultanhannyń bási biik tústi.

Alamandy qyzdyrǵan tartysty aitys jasaǵan – Rinat Zaitov pen Aidos Rashat, Didar Qamiev pen Muhtar Niiazovtyń juby. Tórt aqyn da – talai dodalarda top jaryp júrgen myqtylar. Talai alamanda báige alǵan has júirikter. Birinen biri qara úzip tur. «Baq shaba ma, bap shaba ma?» degendei, aitysta da baǵy ozǵandar alǵa shyǵady. Alǵashqy kúni tartysty aitys jasaǵan Didar Qamiev bul joly Muhtar Niiazovqa ese jiberdi. Qashanda shappa-shap aitysqa daiyn turatyn Muhtar aqyn bul joly da osaldyq tanytqan joq. Sońyna deiin «jan alysyp, jan beristi». «Halyqtyń mańdaiynan aqqan terge, qaiyq salyp, júzýdi doǵaryńdar» degen aqyn jeńiske jetti.

Rinat Zaitov – kórermenniń yqylasyna bólengen aqyn. Rinat aqyn qatysady degen aqpar shyqsa, taily-taiaǵy qalmai jinalady. Qai kezde týrashyl minezimen kópke unaityn aqyn. Bul joly «týǵanyna da jaqpaityn týra minezimen» qoǵamdaǵy ótkir máselelerdi sózben túirep ótti. Mońǵoliiadan kelgen qarsylasy ekeýi kópke ortaq túitkildi ortaǵa saldy. Qarsylasynan oza shapqan aqyn finalda Muhtar Niiazovpen qaita kezdesti.

Eki kúndik aitysta aqyndar qazaqtyń Astanasyn ǵana jyrǵa arqaý etken joq, qo­ǵam­dy alańdatqan máseleler de ortaǵa salyn­dy. Túidek-túidek oi aityldy aqyndar­dyń aýzymen. «Óziniń Astanasyn árbir qazaq, qor­ǵasyn eki kózdiń qarasyndai» degen aqyn­dar 20 jylda jetken jetistigimizdi de jyrǵa arqaý etti.

Bas júlde – eki aqynda

«Jyr arqaýy – Astana» aitysyna qatysqan 20 aqynnyń da osaly joq. Bári bir-bir oblystyń úkilegen úmitteri. Senim artqan serileri. Aitys – ultty rýhy. Aitys dese, delebesi qozbaityn qazaq joq. Qazaq óneriniń ishinde asqaǵy da, biigi de – aitys. Aitysker de – sol deńgeide. «Aǵaiynnyń aty ozǵansha, aýyldastyń taiy ozsyn» deitin qazaq eki kún boiy aitys kórip, jyrǵap qaldy.

Qazylar alqasyn Jazýshylar odaǵynyń basqarma tóraǵasy, aqyn Ulyqbek Esdáýlet bas­qardy. Quramynda belgili aqyn Júrsin Erman, Mońǵoliiadan kelgen zertteýshi ǵalym Shynai Rahmetuly, Túrkiiadan kelgen ǵalym Ábdýaqap Qara, Halyq aqyny Ásiia Berkenova, Eýraziia ýni­ver­sitetiniń prorektory Dihan Qamzabekuly, belgili pýblitsist, «Aiqyn» gazetiniń bas redaktory Nurtóre Júsip bar. Qazylar alqasynyń sheshimimen, 20 aqynnyń ishinen oza shapqandar júldeli oryndarǵa ie boldy. Úsh birdei aqyn úshinshi oryn: Aibek Qaliev, Maqsat Aqanov, Serik Qoishyǵulovqa buiyrsa, ekinshi oryn Meiirbek Sultanhan men Rústem Qaiyrtaiulyna berildi. Finalda bir-birinen kem túspegen eki aqyn: Muhtar Niiazov pen Rinat Zaitov ta bas júldeni qanjyǵasyna bailady. Aitysty bastan-aiaq tamashalaǵan Mádeniet jáne sport ministri Arystanbek Muhamediuly ekeýin bir-birinen bólmei, teń júlde taǵaiyn­dap, óz qolymen tabys etti. Eki aqyny júlde alǵasyn kórer­men de dán riza boldy. Júlde qory da qomaq­ty: yntalandyrý syilyǵyn alǵan aqyndar 500 myńnan júl­dege ie boldy. Ádilqazyǵa da renish bildirip, ókpe artqan aqyn bolǵan joq. Kópshilik te dán riza, júlde alǵan aqyndar da riza. Tek qana Didar Qamiev qamyǵyp qalǵandai...

«Aitys – halyqtyń rýhyn kóteretin óner» ekenin únemi aityp júremiz. Biraq sońǵy kezderi aityskerler de «qýlanyp» aldy. Qaitalaýlar kóp. Almatyda aitqan sózin Astanada qaitalaidy, bolmasa, Taldyqorǵan tórindegi aitysty «bildirmei» qosyp jiberedi. «Jymyn bildirmei» jiberdim dep, jymyń-jymyń etkenimen, turaqty kórermenge bári anyq. Únemi aitystarda qaitalanyp kele jatqan «bir tirkester» bar. Ony aqynnyń ózi de biledi, kórermenniń ózi de sezedi. Bul – bir.

Ekinshiden, aqparatty tolyq zerttemeidi. Áleýmettik jelide «hit» bolǵan taqyrypqa áýes. Trendtegi dúnieni qozǵasaq, kóp «upai» jinaimyz dep oilaidy. Úshinshiden, kórermenge ne unaitynyn biletin kei «akter» aqyndar bar. Áleýmettiń álsiz tusyn tiimdi meńgergen. Sol arqyly ózine «bedel» jinaidy. Aqynnyń bul «oiyny» ózine utys ákelgenimen, abyroi ápermeitinin eskerse deimiz.

Gúlzina BEKTAS, Aidar AIZATQYZY

"Aiqyn" gazeti