Qostanai oblysynyń Qarasý aýdanynda áielin óltirgen 26 jastaǵy jigitke qatysty qylmystyq is boiynsha sot úkim shyǵardy. Sot ony 11 jyl 6 aiǵa bas bostandyǵynan aiyrdy, dep habarlaidy ult.kz.
Qylmys 1 aqpanda bolǵan. Áieli kúieýine odan ketetinin jáne endi onyń maskúnemdigi men qorlyǵyna shydamaitynyn aitqan. Osydan keiin er adam oǵan shabýyl jasap, óltirgen. Keiin máiitti úi aýlasyndaǵy sharýashylyq qurylystarynyń birine jasyryp qoiǵan.
Kelesi eki ai boiy ol marqumnyń týystaryna áieliniń qaida ekenin bilmeitinin, onyń qalaǵa ketip, jumysqa ornalasqanyn aityp kelgen. Tipti áieli jumys istep júr degen keńsege Qostanai qalasyna eki ret baryp, izdeý jumystaryna qajet dep marqumnyń aǵasynan 300 myń teńge alǵan.
Áieldiń ákesi qyzynyń joǵalyp ketkeni týraly politsiiaǵa aryz jazǵannan keiin shyndyq belgili boldy. Sol kezde er adam máiitti jasyrǵan jerin kórsetken.
Sot otyrysynda aiyptalýshy óz kinásin tolyq moiyndady. Bul jaza taǵaiyndaý kezinde jeńildetetin mán-jai retinde eskerildi.
Iske tóraǵalyq etken sýdianyń túsindirýinshe, dál osy sebepti oǵan qasaqana adam óltirgeni úshin kózdelgen eń joǵarǵy jaza — 15 jyl bas bostandyǵynan aiyrý taǵaiyndalmaǵan. Buǵan deiin sottalmaǵandyqtan, ol jazasyn eń joǵary emes, ortasha qaýipsizdik deńgeiindegi qylmystyq-atqarý júiesi mekemesinde óteidi.
Sot jábirlenýshi taraptyń azamattyq talabyn ishinara qanaǵattandyryp, sottalǵan azamatty 10 mln teńge kóleminde moraldyq ótemaqy jáne 167 myń teńge materialdyq shyǵyn óteýge mindettedi. Sondai-aq talaptyń oryndalýyn qamtamasyz etý maqsatynda sottalǵannyń úiine salynǵan tyiym kúshinde qaldyryldy.
Marqumnyń týystary sot úkimin tym jeńil dep baǵalady. Úkim zańdy kúshine engen joq jáne oǵan apelliatsiialyq tártippen shaǵym jasaýǵa bolady.
