Ózge elge turaqty turýǵa ketip bara jatqandar qujattaryn migratsiialyq HQO arqyly rásimdei alady, dep habarlaidy "QazAqparat".
«Azamattarǵa arnalǵan úkimet» memlekettik korporatsiiasynyń málimetinshe, eńbek migranttaryna arnalǵan kóshi-qon ortalyqtarynda kórsetiletin memlekettik qyzmetter sany artty. Budan buryn atalmysh ortalyqta sheteldikter jumys isteýge ruqsat alyp, QR aýmaǵyna ýaqytsha keletinderge jeke sáikestendirý nómiri ǵana beriletin.
«Elimizde 12 kóshi-qon ortalyǵy jumys isteidi. Búgin taǵy bir ortalyqty Qyzylorda qalasynda ashyp otyrmyz. Qazaqstanǵa keletin eńbek migranttary kóp, biraq barlyǵy birdei qyzmetin zańdastyra bermeidi. Birneshe memlekettik organnyń arasyndaǵy sergeldeńnen soń olar qujattaryn retteýge asyqpaidy. Kóshi-qon ortalyǵy kóleńkede júrgen eńbek migranttarynyń zańdy túrde tirkelýine yqpal etedi. Osy rette kóshi-qon HQO-sy arqyly kórsetiletin qyzmetter sany kóbeietin boldy», - dep atap ótti memlekettik korporatsiianyń basqarma tóraǵasy Abylaihan Ospanov.
2019 jylǵy aqpan aiynyń sońyna deiin kóshi-qon ortalyqtary kelesi qyzmetterdi kórsetedi:
- QR aýmaǵyna ýaqytsha keletin sheteldikter men azamattyǵy joq tulǵalardy tirkeý;
- QR tysqary aimaǵyna turaqty turýǵa shyǵatyndardyń qujattaryn rásimdeý;
- QR vizalaryn berý boiynsha qabyldaýshy tulǵalardyń shaqyrýlaryn qabyldaý jáne kelisý.
Búginde IIM-men birlesip ashylǵan migratsiialyq HQO-da eńbek migranttary qajetti memlekettik qyzmet túrlerin «bir tereze» qaǵidaty boiynsha ala alady. Bul jerde meditsinalyq tekseris pen daktiloskopiiadan ótip, saqtandyrý polisin de qosa rásimdeýge bolady. Buryn migranttar eńbek etýge beriletin ruqsat qujattaryn alý jáne onyń merzimin uzartý úshin 6 memlekettik mekemege baryp, 3-5 kúnin jumsaityn. Qazir qajetti qujattardy kóshi-qon ortalyǵy arqyly bir saǵattyń ishinde rásimdeýge bolady.
