Foto: ozen.kz
«Ózenmunaigazdaǵy» tekseris kezinde 160 quqyq buzýshylyq pen sáikessizdik anyqtaldy, dep habarlaidy "Ult aqparat" «QazMunaiGaz» ulttyq kompaniiasyna silteme jasap.
«Jańaózen qalasynda QMG arnaiy jumys toby tekseris júrgizýdi jalǵastyryp jatyr. Qazir 55 sharýashylyq qyzmet nysany, sonyń ishinde «Ózenmunaigaz» AQ-tyń (ÓMG) 17 óndiristik qurylymdyq bólimshesi, 8 munai servis uiymy men 30 basqa da merdiger uiymnyń qyzmeti taldandy.
ÓMG-niń qarjy-sharýashylyq qyzmetin tekserý kezinde aldyn ala 160 quqyq buzýshylyq pen sáikessizdik anyqtaldy, onyń ishinde:
- 7 fakti QR zańnamasyna sai sharalar qabyldaý úshin quqyq qorǵaý organdaryna jiberildi;
- 10 fakti boiynsha qyzmettik tergeý júrip jatyr;
- 101 fakti boiynsha jaýapty tulǵalarǵa tártiptik jaza qoldanylady», - delingen habarlamada.
Quqyq buzýshylyq faktileriniń saldarynan keltirilgen shyǵyn somasy protsessýaldy jáne reglamentteýshi is-sharalardyń qorytyndysy boiynsha belgili bolady.
«Biz quqyq qorǵaý organdarymen tyǵyz jumys istep, zańǵa qaishy anyqtalǵan áreketter jaily der kezinde habarlap otyrmyz. Budan ári olar tergeý júrgizip, ózge is-sharalardy qolǵa alady. Solardyń birine keshe Ekonomikalyq tergeý departamentiniń «Ózenmunaigaz» bas direktorynyń orynbasaryn ustaý faktisi de jatady. Komissiianyń jumysy áli aiaqtalmady, kóptegen fakt boiynsha qyzmettik tergeýler júrip jatyr», — dedi arnaiy jumys tobynyń jetekshisi, QMG Basqarma tóraǵasynyń orynbasary Dáýletjan Hasanov.
