Mańǵystaý oblysyndaǵy Ózen ken ornynan jan-jaqty barlaý barysynda jańa munai shoǵyry tabyldy, dep habarlaidy QazAqparat «Qazmunaigaz» kompaniiasynyń baspasóz qyzmetine silteme jasap.
Baspasóz qyzmetiniń málimetterine qaraǵanda, shyǵarylatyn munai qorynyń ósimi 39,9 mln tonnany quraidy.
«Kómirsýtek qorynyń ósimi «QazMunaiGaz» UK AQ ekonomikalyq kórsetkishterine eleýli áser etedi. 2017 jyly «QazMunaiGaz» UK AQ, «Ózenmunaigaz» AQ, «QMG Injiniring» JShS jáne «Aqtaý qalasyndaǵy QMG Injiniring» filialynyń geologtar toby Ózen ken ornyn jete barlaýdyń egjei tegjeili baǵdarlamasyna bastamashy boldy. Osy baǵdarlama sheńberinde 2017-2021 jyldary ishinde joǵary kórsetkishti seismobarlaý 3D túsirilimi (368 sharshy km) júrgizildi, barlyq uńǵyma qoryna qaita taldaý jasaldy (7500-den astam), geologiialyq tujyrymdamasy qaita qaraldy jáne geologiialyq 3D-úlgisi qaita qurastyryldy.
Júrgizilgen jumystardyń nátijesinde ken ornynyń qurylymy naqtylandy jáne jańa munai shoǵyry tabyldy. Atqarylǵan jumystardyń qorytyndysy boiynsha Ózen ken ornynyń munai qory 8%- ǵa ulǵaidy, bul óz kezeginde shyǵarylatyn qordyń 39,9 mln tonnasyn qurap otyr»,-delingen habarlamada.
Qazaqstan Respýblikasynyń paidaly qazbalar qory jónindegi memlekettik komissiiasy kómirsýtektiń naqtylanǵan kólemin 2021 jyldyń sońynda balansyna qabyldady.
Qazirgi ýaqytta jańa qordy esepke alý jáne olardy óndirýdi josparlaý maqsatynda ken oryndy igerý jobasyna túzetý engizilýde.
