Ózbekstandaǵy Sardoba sý qoimasyndaǵy jarylysqa bailanysty qozǵalǵan is boiynsha 9 adam qamaýǵa alyndy. Bul týraly eldiń bas prokýratýrasy habarlady.
Sý qoimasy biyl 1 mamyrda jarylyp, Ózbekstanda alty adam qaitys bolyp, 70 myńdai adam evakýatsiialanǵan. Sardoba sýy Qazaqstanǵa deiin ótip, Túrkistan oblysy Maqtaaral aýdanyndaǵy birneshe aýyldy sý alǵan edi.
Kúdikke ilindender arasynda "Syrdariia sýv kýrilish invest" mekemesiniń qurylysqa tapsyrys berýshisi, UzGip kompaniiasynyń jobalaýshysy, "Ýztemiriýlkýrilishmontaj" mekemesiniń bas merdigeri, "Rezaksoi sýv kýrilish" mekemesiniń merdigeri, "Týpalang Sherobod" mekemesiniń merdigeri, sý sharýashylyǵy ministrliginiń qyzmetkeri bar.
Tekseris qorytyndysynda sý qoimasyndaǵy jarylysqa jobalaý qujatyndaǵy, qurylys kezindegi qatelikter sebep dep kórsetilgen.
Sardoba sý qoimasy 2017 jyly salynǵan. Qurylysty salýǵa eldiń qazirgi prezidenti Shavkat Mirziiaev premer bolyp turǵanda pármen bergen. Sý qoimasyn salýǵa 404,4 mln dollar bólingen.
Ózbekstandaǵy sý apatynan Qazaqstannyń Maqtaaral aýdanyndaǵy alty aýyl zardap shekti. Kóldeneń kelgen apattan myńnan astam turǵyn úi, úsh mektep, bes balabaqsha, birneshe meditsina mekemesi men mádeniet úii búlindi. Sý alǵan aimaqta turatyn 31 myńnan astam adam úi-múlkin tastap ketýge májbúr boldy. Qazaqstan biligi apattan zardap shekkenderge 100 myń teńge (240 dollar) tóledi.
Sarapshylar sý qoimasynyń apatyna jemqorlyq, qurylys materialdaryna bólingen qarjyny jeýden boldy dep esepteidi.
