ٶزبەكستانداعى ساردوبا سۋ قويماسىنداعى جارىلىسقا بايلانىستى قوزعالعان ٸس بويىنشا 9 ادام قاماۋعا الىندى. بۇل تۋرالى ەلدٸڭ باس پروكۋراتۋراسى حابارلادى.
سۋ قويماسى بيىل 1 مامىردا جارىلىپ, ٶزبەكستاندا التى ادام قايتىس بولىپ, 70 مىڭداي ادام ەۆاكۋاتسييالانعان. ساردوبا سۋى قازاقستانعا دەيٸن ٶتٸپ, تٷركٸستان وبلىسى ماقتاارال اۋدانىنداعى بٸرنەشە اۋىلدى سۋ العان ەدٸ.
كٷدٸككە ٸلٸندەندەر اراسىندا "سىردارييا سۋۆ كۋريليش ينۆەست" مەكەمەسٸنٸڭ قۇرىلىسقا تاپسىرىس بەرۋشٸسٸ, UzGip كومپانيياسىنىڭ جوبالاۋشىسى, "ۋزتەميريۋلكۋريليشمونتاج" مەكەمەسٸنٸڭ باس مەردٸگەرٸ, "رەزاكسوي سۋۆ كۋريليش" مەكەمەسٸنٸڭ مەردٸگەرٸ, "تۋپالانگ شەروبود" مەكەمەسٸنٸڭ مەردٸگەرٸ, سۋ شارۋاشىلىعى مينيسترلٸگٸنٸڭ قىزمەتكەرٸ بار.
تەكسەرٸس قورىتىندىسىندا سۋ قويماسىنداعى جارىلىسقا جوبالاۋ قۇجاتىنداعى, قۇرىلىس كەزٸندەگٸ قاتەلٸكتەر سەبەپ دەپ كٶرسەتٸلگەن.
ساردوبا سۋ قويماسى 2017 جىلى سالىنعان. قۇرىلىستى سالۋعا ەلدٸڭ قازٸرگٸ پرەزيدەنتٸ شاۆكات ميرزيياەۆ پرەمەر بولىپ تۇرعاندا پەرمەن بەرگەن. سۋ قويماسىن سالۋعا 404,4 ملن دوللار بٶلٸنگەن.
ٶزبەكستانداعى سۋ اپاتىنان قازاقستاننىڭ ماقتاارال اۋدانىنداعى التى اۋىل زارداپ شەكتٸ. كٶلدەنەڭ كەلگەن اپاتتان مىڭنان استام تۇرعىن ٷي, ٷش مەكتەپ, بەس بالاباقشا, بٸرنەشە مەديتسينا مەكەمەسٸ مەن مەدەنيەت ٷيٸ بٷلٸندٸ. سۋ العان ايماقتا تۇراتىن 31 مىڭنان استام ادام ٷي-مٷلكٸن تاستاپ كەتۋگە مەجبٷر بولدى. قازاقستان بيلٸگٸ اپاتتان زارداپ شەككەندەرگە 100 مىڭ تەڭگە (240 دوللار) تٶلەدٸ.
ساراپشىلار سۋ قويماسىنىڭ اپاتىنا جەمقورلىق, قۇرىلىس ماتەريالدارىنا بٶلٸنگەن قارجىنى جەۋدەن بولدى دەپ ەسەپتەيدٸ.
