Ózbekstan shyǵysyndaǵy Namangan qalasynda jergilikti turǵyndardyń biri Emmanýel Makronnyń málimdemesine qarsylyq retinde qonaq úilerdiń biriniń aldynda ilinip turǵan frantsýz týyn julyp tastaǵan. Bul aqparatty Azattyqtyń Ózbek qyzmeti habarlady.
Bul áreketi jaily Facebook-ta habarlaǵan namangan belsendisi týdy "qarsylyq belgisi retinde" julǵanyn aityp, "Namanganda frantsýz týyna oryn joq" dep jazǵan. Osyǵan deiin áleýmettik jelide Muhammed Ikram esimdi er adamnyń Frantsiia prezidenti men áieliniń sýretin taptap turǵany týraly video da jariialanǵan.
Namangan oblysynyń ákimshiligi, ishki ister ministrligi jáne Ózbekstan syrtqy ister ministrligi oqiǵaǵa bailanysty túsinikteme bermedi. Namanganda eń qymbat sanalatyn Grand Sherdor qonaq úiiniń ókili "týlardy aýystyryp qoidyq" dep aitqan. Azattyqtyń Ózbek qyzmetiniń tilshisiniń ózge suraqtaryna jaýap bermegen. Jergilikti politsiia oqiǵadan habary joǵyn aitqan.
Oqiǵadan birneshe saǵat ótkennen keiin belsendi "tý julǵany jaily" jazbasyn óshirip tastaǵan, sebebin túsindirmegen.
Frantsiiada oqýshylarǵa sabaq kezinde sóz bostandyǵy týraly aityp, Muhammed paiǵambardyń karikatýrasyn kórsetken muǵalim 16 qazanda óltirilgen. Osydan keiin prezident Emmanýel Makron Frantsiia sóz bostandyǵynan bas tartpaidy, karikatýraǵa da tyiym salmaidy dep málimdep, saiasatkerdiń bul sózi Taiaý Shyǵystaǵy keibir elderde narazylyq týǵyzǵan. Makronnyń saiasi islam jaily málimdemesin Túrkiia prezidenti Rejep Erdoǵan "islamdy qorlaý" dep baǵalap, frantsýz ónimderine boikot jariialaǵan.
