Ózbekstanda internette jáne telekommýnikatsiia jelileri arqyly prezidentke "til tigizip", "ósek-aiań taratqandardy" qylmystyq jaýapkershilikke tartatyn túzetýler qabyldandy. Mundai sheshim prezident sailaýyna jarty jyl qalǵan kezde jáne úkimet synshylaryna qysym artqan shaqta qabyldanyp otyr, dep habarlaidy Azattyq.
Ózbekstan ádilet ministrligi 31 naýryzda normanyń birden kúshine enetinin habarlady. Oǵan jaqynda prezident Shavkat Mirziiaev qol qoiǵan.
Jańa túzetýlerge sáikes, "tártipsizdik pen kúsh qoldanýǵa jariia túrde arandatý" áreketine de qylmystyq jaýapkershilik qarastyrylǵan: 5-10 jyl aralyǵynda túrme jazasy berilýi múmkin.
Mirziiaevtiń birinshi prezidenttik merzimi 2021 jyly aiaqtalady. Ol aldaǵy prezident sailaýyna qatysady dep aitylady. Mirziiaev Ortalyq Aziiadaǵy halqy eń kóp memleketti avtoritar basshy Islam Karimov qazasynan keiin basqaryp keledi.
Mirziiaev saiasi tutqyndarǵa bostandyq berip, kórshi jáne ózge memlekettermen qarym-qatynasty nyǵaitqan reformator retinde kórinýge tyrysady, biraq kóptegen belsendiler reformalardyń ústirt bolǵanyn aitady.
Ol eldegi oppozitsiialyq toptarǵa qarsy emestigin málimdegen, alaida shynaiy oppozitsiialyq partiialar is júzinde 1991 jyldan beri tirkele almai júr.
Buǵan deiin belgisiz bireýler "Hakikat va Tarakkiiot" (Aqiqat pen qareket) oppozitsiialyq partiiasynyń belsendilerin uryp-soǵyp, keńselerin qiratyp ketken. Partiia jaqtastary saiasi uiymdy tirkeý úshin qol jinamaq bolǵan.
31 naýryzda halyqaralyq Human Rights Watch uiymy táýelsiz bloger Miraziz Bazarovtyń aýyr soqqyǵa jyǵylýyna bailanysty alańdaýshylyq bildirip, ózbek biligin kinálilerdi tabýǵa shaqyrǵan. Bloger 28 naýryzda úiiniń mańynda soqqyǵa jyǵylǵan. Ol oǵan deiin LGBT qaýymdastyqtaryn qorǵap sóilegen.
Ózbekstanda kezekti prezident sailaýy 24 qazanda ótedi.
