Ózbekstannyń "Erk" (Erik) oppozitsiialyq partiiasy qazan aiynda ótetin prezident sailaýyna qatysatynyn málimdedi.
"Ózbekstan tarihynda tuńǵysh táýelsiz partiia atanǵan, 1991 jyly resmi túrde tirkelip, sodan beri qysym men quqai kórip kele jatqan "Erk" demokratiialyq partiiasy aldaǵy prezident sailaýyna kandidat usyný týraly sheshim qabyldady" delingen partiianyń 5 sáýir kúngi málimdemesinde. Habarlama uzerk.org saitynda jariialandy.
Partiia ókilderiniń aitýynsha, Ózbekstan ortalyq keńesine saiasi uiymnyń eki múshesi ( Salovat Omirzakov jáne Djahongir Atadjanov) ózderin kandidat retinde tirkeý týraly ótinish berip qoiǵan. Ortalyq keńes ótinishterin áli qarastyryp jatyr.
Byltyr ózbek úkimeti "Erk" partiiasyna jumysyn jandandyrýǵa ruqsat bermegen. Partiia dúisenbilik málimdemesinde biliktiń táýelsiz partiialardy tirkeýge kedergi jasap otyrǵanyn synaǵan.
"Erk" demokratiialyq partiiasy – Ózbekstanda resmi túrde alǵash tirkelgen saiasi birlestik. Ony tanymal ózbek aqyny Muhammed Salih qurǵan.
1991 jylǵy prezident sailaýy kezinde Salih sol kezdegi basshy Islam Karimovtiń jalǵyz ári basty qarsylasy bolǵan.
Baqylaýshylar sol kezde sailaýshylardyń basym bóligi – shamamen 50 paiyzynyń Muhammed Salihqa daýys bergenin aitqan. Biraq ortalyq sailaý komissiiasy oppozitsiialyq saiasatker 12 paiyzdan artyq daýys jinai almady dep málimdegen.
Sailaýdan keiin Salihtyń jaqtastary uiymdastyrǵan stýdentter sherýi kúshpen taratylyp, oppozitsiialyq basylymdar jabylǵan. Oppozitsiia jetekshileri ústinen qylmystyq is qozǵalǵan. Sonyń saldarynan oppozitsiialyq saiasatkerler birinen soń biri elden ketýge májbúr bolǵan.
Muhammed Salih Ózbekstannan 1993 jyly ketken. Ol 26 jyldan beri Túrkiiada turady. Karimov tusynda ol "terrorist" retinde tanylyp, halyqaralyq izdeý jariialanǵan. Ózbekstandaǵy týystary qýdalanǵan. 2017 jyly Shavkat Mirziiaev bilikke kelgennen keiin Salih Interpol tiziminen alynǵan.
Ol sol jyly prezident Mirziiaevti qoldap, videomálimdeme jasaǵanmen keiinirek jańa prezidentten kóńili qalǵanyn aitqan. "Úsh jyl popýlizmmen bosqa ketti. Qazir Mirziiaev Karimovqa uqsaityn popýlistke ainaldy. Saiasi salaǵa eshqandai ózgeris ákelmedi" dep málimdedi ol "Nastoiashee vremia" telearnasyna bergen suhbatynda.
