28 qazan kúni Ózbekstan Prezidentiniń tóraǵalyǵymen memlekettik kásiporyndardy reformalaý jáne Prezident jarlyǵyna sáikes memlekettik aktivterdi jekeshelendirý máseleleri boiynsha videoselektorlyq keńes ótti, dep habarlaidy ÓzA agenttigi.
Ózbekstan Prezidenti Shavkat Mirziioev 27 qazan kúni memlekettik aktivterdi jedeldetilgen túrde jekeshelendirý boiynsha jarlyqqa qol qoidy.
Jarlyqta kórsetilgen sharalarmen 2 myńnan astam memlekettik aktiv qamtylady. Olardyń ishinde 479 kásiporyn men 15 jyljymaityn múlik nysanyn saýda-sattyqqa shyǵarý kózdelgen. 62 kásiporyn jekeshelendirýge daiyndalady. 32 kásiporyn men sala transformatsiialansa, 507 bazardyń qyzmeti jetildiriletin bolady.
Onymen qosa, buǵan deiingi aktilerde kórsetilgen 386 nysan, sondai-aq hokimder iske asyrýǵa quzyretti 559 nysan saýda-sattyqqa shyǵarylady.
«Kýkon neftgaz parmalash ishlari» jáne «Horazmsývkýrilish» syndy 62 iri kásiporyndy jekeshelendirý máselesinde, olardyń investitsiialyq tartymdylyǵyn arttyrý mańyzdylyǵy atap ótildi.
Sondai-aq memlekettik jobalaý institýttaryn transformatsiialaý máselesi qozǵaldy. Elde iri qurylys kompaniialarynyń sany artyp keledi. Qurylys kompaniialary men memlekettik jobalaý institýttarynyń tyǵyz kooperatsiiasy esebinen jobalardyń sapasy men basqarý júiesin jaqsartý mindeti qoiyldy. Jańa júie eń aldymen, 6 jobalaý institýtynda engiziletin bolady. Keiinnen jobalaý institýttaryndaǵy memlekettiń qatysýy qurylystaǵy seriktes-uiymdarda iske asyrylmaq.
Budan bólek, keńes barysynda 500-den astam bazar men saýda keshenderine memlekettiń qatysýyn túbegeili qaita qaraý qajettigi aityldy. Bul úshin investorlar arasynda konkýrs jariialanady. Eger bazar tabysy ósip, salyqtyq túsimder men jumys oryndarynyń sany turaqty túrde artatyn bolsa, onda kásipker memlekettik úlesti bólip tóleý shartymen satyp ala alady.
