Ózbekstan Ýngor-Tepa taýyn Qyrǵyzstanǵa berýge kelisti. Bul týraly Olii Majlis zań shyǵarý palatasynyń otyrysynda Ózbekstan premer-ministri Abdýlla Aripov málimdedi, - dep habarlaidy Tengrinews.kz agenttigi Repost.uz saityna silteme jasap.
Ýngor-Tepa taýy Ferǵana alqabyndaǵy eń biik núktelerdiń biri sanalady jáne Namangan oblysyna jaqyn jerde ornalasqan. Onda Ózbekstan men Qyrǵyzstannyń radio jáne televiziia antennalary qoiylǵan.
Aripov taý basyna Ózbekstan jaǵynan shyǵý múmkin emes, jol tek qyrǵyz tarapynda bar ekenin atap ótti. Osyǵan bailanysty ymyraǵa kelý usynylǵan.
"Biz olarǵa jerdi belgileýge múmkindik jasaimyz, biraq olar bizge taýǵa shyǵyp-túsetindei jaǵdai jasaýy kerek. Osyndai kelisim bar", - dedi Ózbekstan premer-ministri.
