Ózbekstan syrtqy ister ministrligi (SIM) ýkrain biligine úndeý jasap, "jergilikti BAQ-ta Tashkentke qarsy negizsiz aiyptaýlarǵa jol bermeýge" shaqyrdy. Bul týraly Gazeta.uz basylymy habarlady, dep jazady Azattyq.
Osyǵan deiin Ýkrainanyń tanymal jýrnalisi Dmitrii Gordonnyń izraildik kásipker Leonid Nevzlinmen suqbaty jariialanyp, onda Ýkrainadaǵy soǵysta qoldanylyp jatqan iran drondary Ózbekstanda óndirilip jatqany aitylǵan.
"Ózbekstan Iran Islam Respýblikasymen áskeri-tehnikalyq salada yntymaqtastyq jasamaitynyn jáne óz aimaǵynda Irannyń áskeri tehnikalaryn ornatpaǵanyn málimdeimiz. Eki el arasyndaǵy qarym-qatynasqa ziian keltiretin mundai negizsiz aiyptaýlardyń Ýkraina aqparat quraldarynda taralýyna jol bermeý úshin tiisti sharalar qoldanýdy suraimyz", - dep jazylǵan Ózbekstannyń SIM taratqan úndeýde.
Dmitrii Gordonnyń Leonid Nevzlinmen suqbaty bir kún buryn jariialanyp, Ózbekstanda iran drondarynyń óndirisi bar ekeni aitylǵan. Gordon odan "Izrail Irandaǵy, Iraktaǵy jáne Ózbekstandaǵy drondar jasaityn aimaqqa soqqy jasai ala ma?" dep suraǵan.
Al Nevzlin "Men Ózbekstan jóninde eshteńe aita almaimyn. Izrail ol jaqta drondar óndirilip jatqanyn biletinin, iia bilmeitinin aita almaimyn. Biraq biletin shyǵar dep oilaimyn. Menińshe Ózbekstannyń drondardy óndirýdi toqtatýyna Izrail men AQSh-tyń qatań eskertýi jetkilikti bolady" degen.
