Tashkent "Meiirim" gýmanitarlyq operatsiiasy aiasynda 156 ózbekstandyq azamatty Taiaý Shyǵystaǵy qarýly qaqtyǵys aimaǵynan elge qaitarǵan. Jetkizilgenderdiń basym bóligi - áielder men balalar.
"Azamattar 30 mamyrda arnaýly reispen Tashkentke jetkizildi. Adasyp elden ketken, aýyr kúnderdi basynan keshken azamattarǵa úkimet meditsinalyq, psihologiialyq, materialdyq jáne moraldyq kómek kórsetedi" dep habarlady prezidenttiń baspasóz qyzmeti.
Biliktiń habarlaýynsha, beibit ómirge úirenip, qoǵamǵa sińisip ketýi úshin olarǵa baspana men jumys berilip, oralǵandar bilim berý men áleýmettik baǵdarlamalarǵa qatysady.
Buǵan deiin Taiaý Shyǵystaǵy qaqtyǵys aimaqtarynan gýmanitarlyq operatsiia aiasynda óz azamattaryn Qazaqstan men Tájikstan da qaitarǵan.
Biyl 7-9 mamyr kúnderi Siriiadan Qazaqstannyń 231 azamaty elge jetkizildi. "Olardyń 156-sy - bala, kóbi mektep jasynda. Taǵy 18-i bala - jetim" dep habarlady bilik. Nur-Sultan budan buryn, 9 qańtarda Siriiadan 47 qazaqstandyqtyń elge qaitarylǵanyn habarlaǵan. Biliktiń dereginshe, olardyń arasynda "áielder men 30 shaqty bala" bolǵan.
2018 jyly shilde aiynda Qazaqstannyń Ulttyq qaýipsizdik komiteti (UQK) Azattyqqa Siriia men Irakta soǵys bastalǵaly Taiaý Shyǵysqa 800-ge tarta qazaqstandyq ketkenin habarlaǵan. Komitet Siriia men Iraktaǵy halyqaralyq terrorlyq uiymdarda Qazaqstannan ketken 120 er adam, 250-den astam áiel jáne 500 bala baryn aitqan. Nur-Sultan Siriiada áli 300-den astam qazaqstandyq qalǵanyn málimdegen.
30 sáýirde Tájikstan biligi Iraktan 84 tájik balany qaitarǵan. Olar - Taiaý Shyǵystaǵy soǵys aimaǵynda qaza tapqan nemese habarsyz ketken "Islam memleketi" ekstremistik tobynyń qatarynda bolǵan sodyrlardyń balalary. Olardyń kóbiniń (43) analary terrorshylarǵa bolysqan degen aiyppen uzaq merzimge sottalyp, Baǵdad túrmesinde jazasyn ótep jatyr.
Resmi málimet boiynsha, 2014 jyldan beri Irak pen Siriiadaǵy soǵys aimaǵyna 1900 tájik azamaty ketken. Olardyń 300-ge jýyǵy qaza tapty dep sanalady. Qaza tapqandar men habarsyz ketkenderdiń áielderi men balalaryn Siriia men Irak biligi bosqyndarǵa arnalǵan lagerlerge ornalastyrǵan.
