Ózbekstannyń syrtqy ister ministrligi Resei úkimetine resmi nota joldap, ózbek migranttaryna salynatyn eńbek salyǵyn tóleýdi keiinge shegerýdi surady. Bul týraly Ózbekstannyń syrtqy ister ministrliginiń aqparat qyzmetiniń jetekshisi Avazbek Hadjimetov habarlady.
Reseidiń quzyrly organdary máseleni qarastyryp jatyr. Avazbek Hadjimetovtiń aitýynsha, Reseide barlyq uiymdar men kásiporyndardyń jumysy 30 sáýirge deiin toqtaǵandyqtan ondaǵy ózbek migranttary jumyssyz, jalaqysyz qalǵan.
2 sáýirde Resei prezidenti Vladimir Pýtin koronavirýsqa bailanysty "jumyssyz apta" merzimin sáýir aiynyń sońyna deiin uzartqan bolatyn. Buǵan deiin Reseidiń ózbek diasporasy Reseidiń ishki ister ministrliginiń kóshi-qon jónindegi basqarmasyna hat joldap, eńbek patentiniń merzimin uzartýdy suraǵan.
Resmi derek boiynsha, Reseide shamamen eki million ózbek migranty jumys isteidi.
