Shavkat Mirziioev Elbasynyń koronavirýs juqtyrǵany týraly habardy úlken alańdaýshylyqpen qabyldady. Bul týraly elbasy.kz saitynda habarlandy.
«Sizge osynaý qiyn-qystaý ýaqytta jan-jaqty qoldaý kórsetýge jáne janyńyzda bolýǵa daiyn ekenimdi jetkizgim keledi. Jaqyn arada Sizdiń bul virýsty jeńip, saýyǵyp ketetinińizge senimdimin. Qurmetti Nursultan Ábishuly, Alla Taǵala Sizge zor densaýlyq, kúsh-qýat, uzaq ǵumyr jáne jańa tabys bersin dep tileimin. Jaqynda Ózińizben júzdesý múmkindigi týady degen úmittemin», - delingen jedelhatta.
Aita ketsek, búgin Elbasynyń baspasóz hatshysy Aidos Úkibai Qazaqstannyń Tuńǵysh Prezidenti – Elbasy Nursultan Nazarbaevtyń Covid-19-ǵa tapsyrǵan synamasy oń nátije kórsetkenin habarlaǵan edi. Soǵan qaramastan Nursultan Ábishuly ózin-ózi oqshaýlap, qashyqtan jumys isteýdi jalǵastyrýda.
