QR Premer-Ministriniń orynbasary Eraly Toǵjanov elimizde Pfizer vaktsinasy nege aqyly túrde qoljetimdi emestigin túsindirdi, dep habarlaidy QazAqparat.
Jýrnalister Toǵjanovtan Pfizer vaktsinasy Qyrǵyzstan men Ózbekstanda aqyly túrde salynatynyn, al Qazaqstanda mundai múmkindik nege berilmegenin surady.
«Ózbekstanda da, Qyrǵyzstanda da bul - vaktsina túrindegi gýmanitarlyq kómek boldy. Al Qazaqstanǵa múldem basqa sharttar qoiyldy. Biz olarmen uzaq kelissóz júrgizdik. Saqtandyrý qoryn qurý týraly talaptar men sharttar qoiyldy, árine, biz mundai sharttardy qabyldai almadyq. Sondyqtan, biz olarmen tórt million Pfizer vaktsinasyn bólek jetkizý týraly ózara kelisimge keldik. Kelisimde bizde jeke naryqta aqyly túrde salý qarastyrylmaǵan», - dedi Toǵjanov QR Mádeniet jáne sport ministrliginiń alqa májilisinen keiin tilshilerge bergen suhbatynda.
Jýrnalister «gýmanitarlyq kómekti (Ózbekstan men Qyrǵyzstanǵa vaktsina túrinde jetkizilgen) satýǵa bola ma?» degen suraq qoidy.
«Onysyn bilmeimin, qalai bolǵanda da, meniń bilýimshe Pfizer kompaniiasy bir de bir elde áli satýǵa ruqsat bergen joq. Qandai shema boiynsha júrip jatyr? Basqa memleketter úshin jaýap bere almaimyn, bilmeimin», - dedi Eraly Toǵjanov.
Sonymen birge ol otandyq vaktsina sheteldik vaktsinalardan kem emes ekenin jáne balama úshin qytailyq vaktsina da bar ekenin aitty.
«Nelikten biz óz vaktsinamyzdy paidalanbaimyz, nege basqalaryna jarmasamyz? Pfizer-di kútýdiń qajeti joq – bar nárseni alý kerek. Balama retinde qytailyq vaktsina da bar», - dedi Toǵjanov.
Aita keteiik, Qazaqstanda Pfizer vaktsinasyn egýge bolatyn sanat keńeitildi. Buǵan deiin aitylǵan 12-18 jas aralyǵyndaǵy jasóspirimder, júkti jáne bala emizetin áielderge qosa, endi barlyq toptaǵy múgedektigi bar adamdar da Pfizer ektire alady.
Odan bólek, 50 jastan asqan qazaqstandyqtar da Pfizer vaktsinasymen revaktsina jasatý quqyǵyna ie bolady. Shetelde Pfizer-diń birinshi komponentin alyp, ekinshisine úlgermegender de Qazaqstanda Pfizer-diń ekinshi komponentin sala alady.
