Ózbekstannyń Shortepa aýdany jerine 23 maýsymda enip ketken Aýǵanstannyń shekara áskeri men jergilikti jasaǵynyń 53 qarýly sarbazy ustalǵan. Ózbekstan syrtqy ister ministrliginiń baspasóz qyzmeti olardyń "tiisti jaýap alý men tergeý sharasynan keiin óz eline qaitarylǵanyn" aitty dep habarlady Azattyqtyń Ózbek qyzmeti – Ozodliq radiosy.
Resmi Tashkent Aýǵanstandaǵy, onyń ishinde osy eldiń soltústigindegi shekaralas aimaqtardaǵy áskeri-saiasi ahýaldy muqiiat qadaǵalap otyrǵanyn aitady. Ózbek syrtqy ister ministrligi janjalǵa qatysýshy barlyq taraptardy kúsh qoldanýdan bas tartyp, beibit turǵyndar arasynda adam qanynyń tógilýine jol bermeýge shaqyrdy.
"Ózbekstan Aýǵanstanmen dástúrli dostyq jáne tatý kórshi qatynasyn berik saqtaýǵa barynsha qoldaý kórsetýge, beitaraptyqty saqtaý jáne kórshi eldiń ishki isine aralaspaý ustanymynan eshqashan ainymaitynyn nyq senimmen málimdeidi" degen ministrlik.
Beisenbide Tájikstan ulttyq qaýipsizdik komitetiniń shekara áskeri memlekettik shekarany Aýǵanstan úkimet kúshteriniń 134 áskeri qyzmetshisi kesip ótkenin habarlaǵan. Tájik shekarashylary "gýmanizm men tatý kórshi printsipterin basshylyqqa ala otyryp, aýǵan áskerilerine Tájikstan aýmaǵyna erkin kirýge ruqsat berdi" delingen resmi habarlamada.
25 maýsymda Tájikstan, Qazaqstan jáne Ózbekstan basshylary Aýǵanstannyń soltústigindegi jaǵdaidy talqylady.
Aýǵanstandaǵy "Taliban" qozǵalysynyń qarýly jasaǵy keiingi birneshe aptada ondaǵan aýdandy basyp aldy. Buǵan deiin AQSh pen halyqaralyq koalitsiia kúshteri 2021 jyldyń 11 qyrkúieginen qalmai Aýǵanstannan shyǵyp ketetini habarlanǵan, "Taliban" ol merzimdi kútpesten belsendi is-qimylǵa kóshken.
Tálipter qazir Aýǵanstan aýmaǵynyń 70 paiyzyna deiingi bóligin baqylaýynda ustap otyr.
Keiingi kezde olar Tájikstanmen shekaralas ólkedegi birqatar aýdandy baǵyndyrdy. 22 maýsymda "Taliban" kúshteri Aýǵanstan men Tájikstan shekarasy arqyly ótetin negizgi ótkeldi – Sherhan-Bandardy basyp aldy. Bul shekara ótkeli Qundyz ýálaiatynyń ákimshilik ortalyǵynan 50 shaqyrym jerde ornalasqan, qazir ol qalanyń ózi de "Taliban" qorshaýynda qalyp otyr.
