Ózbekstan burynǵy prezidenttiń qyzy Gúlnara Karimovaǵa tiesili bolǵan 10 mln dollar aktivti Frantsiiadan qaitardy. Bul týraly Ózbekstannyń ádilet ministrliginiń baspasóz qyzmeti habarlady.
"Qarajat Ózbekstannyń memlekettik biýdjetine aýdaryldy jáne jalpy tártipte paidalanylatyn bolady" delingen resmi habarlamada.
Bilik sonymen birge Shveitsariia, AQSh, Frantsiia, Reseidiń quzyrly organdarymen birigip, qalǵan qarajatty qaitarýǵa kúsh salyp otyrǵanyn jetkizdi. Másele Karimovanyń 1,3 mlrd dollar aktivi jaiynda bolyp otyr.
Ózbekstannyń birinshi prezidenti Islam Karimov qaza bolǵannan keiin 2017 jyly qyzy Gúlnara Karimova Ózbekstanda 10 jylǵa bas bostandyǵynan airylǵan bolatyn. Ony "salyqtan jaltardy", "qarjy jymqyrdy", "bopsalady", "ofshor kompaniiasynyń qujattaryn joidy" dep aiyptady. AQSh jáne Eýrodaqtyń birneshe múshesi Karimovany qarjy jymqyrdy dep aiyptaǵannan keiin Ózbekstanda eks-prezidenttiń qyzynyń ústinen is qozǵalǵan.
Karimovaǵa alǵash ret sot úkimi shyqqannan keiin biraz ýaqyt úiqamaqta otyrdy, biraq 2019 jyly naýryz aiynda "úiqamaq erejesin buzdy" dep aiyptalyp, Tashkent oblysyndaǵy túrmege jiberildi. Karimova men onyń qyzy bul aiyptardy joqqa shyǵardy. Osydan soń Karimovanyń ústinen ekinshi qylmystyq is qozǵalǵan.
Úshinshi qylmystyq is boiynsha ol 13 jyl 4 aiǵa bas bostandyǵynan airylǵan. Oǵan jáne onymen birge sottalǵan taǵy birneshe adamǵa "qylmystyq qaýymdastyq quryp, aqsha bopsalaý, biýdjet qarjysyn jymqyrý, qylmystyq jolmen alynǵan qarjyny zańdastyrýmen bailanysty qylmys jasady" degen aiyptar taǵyldy.
