Ózbekstan azamaty Evgenii Homenko týysyna kómekteskeni úshin Qaraǵandy oblystyq politsiia departamenti Jol-patrýl politsiia batalonynyń qyzmetkerlerine jáne Qazaqstan Respýblikasy IIM basshylyǵyna Facebook arqyly alǵys aitty, dep habarlaidy QazAqparat jelidegi jazbaǵa silteme jasap.
Ózbekstan azamaty óz jazbasynda aitqandai, qyrkúiek aiynda qaiǵyly oqiǵa bolǵan. Onyń 59 jastaǵy qaiyn atasy Ivan Petrovich Milinchýk jol ústinde syrqattanǵan. Ol uzaq jolǵa júk tasymaldaityn júrgizýshi bolyp jumys isteitin edi.
2018 jyldyń 19 qyrkúieginde Ivan Milinchýk MAN kóligimen Almaty - Ekaterinbýrg tasjolymen Resei shekarasyna qarai bet alǵan. Evgeniidiń jubaiy alys jolǵa ketken ákesimen bailanyspaq bolady. Qyzy ákesiniń tiliniń kúrmelip, densaýlyǵy bolmai turǵanyn birden baiqap, toqtaýyn suraidy. Alaida, Ivan Petrovich qyzyn jubatyp, júk apara jatqanyn aitady jáne en dalada toqtai almaitynyn jetkizedi.
Ivan Petrovichtiń telefonyna ornatylǵan qosymsha arqyly týystary onyń Qaraǵandyǵa bet alǵanyn kóredi. Ákesiniń keshke qaida ekenin bilmek bolǵan erli-zaiyptylar onyń telefonynyń óship turǵanyn túsinedi.
20 qyrkúiek kúni tańerteń olarǵa Ivan Petrovichtiń dosy qońyraý shalyp, onyń insýltpen aýrýhanaǵa túsip qalǵanyn habarlaidy. Sondai-aq, ol Qaraǵandy oblystyq JPPB qyzmetkeri leitenant Erqanat Datkinniń nómirin beredi. Evgenii odan qaiǵyly oqiǵanyń mán-jaiyn estidi.
19 qyrkúiek kúni 18:40-ta leitenanttar Erqanat Datkin men Jasulan Egenov júk kóligin kórip, ony toqtatady. Politseiler onyń ishinen sóilei, qimyldai almai qalǵan Ivan Petrovichti kórip, jedel járdem shaqyrady. Erqanat Datkin júrgizýshiniń telefonyndaǵy sońǵy qońyraý shalǵan nómirge habarlasyp, mán-jaidy aitady. JPP qyzmetkerleri naýqasty jedel járdemniń alyp ketkenin kútedi, keiin mashinany aqyly turaqqa jetkizedi jáne taýarlar buzylyp ketpes úshin ondaǵy temperatýrany eki táýlik boiy baqylaýda ustaidy.
Evgenii politseilermen sóileskennen keiin Qazaqstanǵa ushyp jetedi. Dárigerler Ivan Petrovichtiń ómirin saqtap qala almaǵan, onyń miynyń basym bóligi zardap shekken. 22 qyrkúiekte ol kóz jumady.
«Men bóten qalada, bóten elde júrsem de, maǵan eki politsiia qyzmetkeri - leitenant Erqanat Ábdirahmanuly Datkin men Jasulan Jambyluly Egenov kómektesti. Olarǵa alǵysym sheksiz. Astanadan Qaraǵandyǵa jetkenge deiin olar menimen bailanysyp, aýrýhanaǵa jiberdi. Eki táýlik boiy muzdatqyshtaǵy temperatýralyq rejimdi baqylap otyrdy. Sondai-aq, Ózbekstannan júrgizýshi kelgen kezde maǵan habarlasyp, ol adamǵa senetinimdi naqtylap, ákemniń kóligin tapsyrýǵa ruqsat surady. Sebebi, kólikte ákemizdiń jeke zattary, qujattar, aqshalar boldy», - deidi Evgenii Homenko.
Onyń aitýynsha, 2 qazaqstandyq leitenant áýejaiǵa kelgen kezde de habarlasqan.
«Meni múldem tanymaityn 2 bóten adam meniń problemalaryma jany kúizelip, ony sheshýge jantalasty jáne qaiǵyma ortaqtasty. Olardyń ata-anasyna, ustazdaryna, komandirlerine úlken rahmet. Eki leitenatqa aitar alǵysym sheksiz. Qazaqstan aýmaǵynda júrgen kezimde olarmen kezdespedim, tek telefon arqyly qashyqtyqtan bailanysyp otyrdyq. Biraq, olar naǵyz azamat retinde qol ushyn berdi. Ózimniń, jubaiymnyń jáne týystarymnyń atynan alǵys aitamyn. Eger kómek qajet bolsa, qolymnan kelgenin aiamaimyn. Qazaqstan Respýblikasy Ishki ister ministrligine osyndai qyzmetkerler úshin kóp rahmet», - dep alǵys bildirdi hat iesi.
