Ózbekstan AQSh-ty eki apta buryn Aýǵanstannan qashqan áskeri ushqyshtardy eline qaitarýy múmkin ekenin eskertti. Bul týraly Vashingtondaǵy derekkózine siltei otyryp The Wall Street Journal basylymy habarlady, dep jazady Azattyq.
Basylymnyń málimetinshe, Ózbekstannyń bul qadamyna tálipterdiń qysymy túrtki bolǵan.
Vashingtonnyń sózinshe, Ózbekstan AQSh-tan aýǵan ushqyshtaryn úshinshi elge meilinshe jyldam alyp ketýdi surap otyr. Óitpegen jaǵdaida, Tashkent táliptermen qarym-qatynasyn ýshyqtyrmaý úshin ushqyshtardy Aýǵanstanǵa qaitarýǵa májbúr bolady.
Munyń aldynda Ózbekstan bas prokýratýrasy 14-15 tamyz kúnderi Aýǵanstannyń 22 áskeri ushaǵy men 24 áskeri tikushaǵy Ózbekstan aýmaǵyna zańsyz ótkenin, olardyń Termez áýejaiyna kúshpen qondyrylǵanyn aitqan. Alaida kóp uzamai bas prokýratýra bul habarlamasyn joqqa shyǵarǵan.
"Taliban" (Qazaqstanda tyiym salynǵan uiym) ushqyshtardy jaý sanaidy, sebebi olar soǵys jyldary dál osy áýe shabýyldarynan kóp zardap shekken. "Taliban" Ózbekstannan ushqyshtarmen birge áýe tehnikalaryn da qaitarýdy talap etip otyr dep habarlaidy The Wall Street Journal.
Aýǵanstan aýdandarynyń basym kópshiligin jaýlap alǵan "Taliban" 15 tamyz kúni Kabýlǵa kirip, tutas eldi baqylaýyna alǵanyn málimdegen. Sodan beri el dúrligip, tálipterdiń repressiiashyl zańdarynan qoryqqan aýǵandar elden ketýge asyqty. Tálipterdiń aýǵan úkimeti áskerin munshalyq jyldam qarqynmen jeńetinin kútpegen Batys koalitsiiasy áýejaiǵa sheginip, ony evakýatsiia ortalyǵyna ainaldyrǵan.
31 tamyz kúni AQSh bastaǵan halyqaralyq koalitsiia Aýǵanstannan birjola ketti. Olar 14-31 tamyz aralyǵynda elden 123 myń sheteldik pen dipókildikterine qyzmet etken aýǵandardy evakýatsiialap úlgerdi.
