Ózbekstan Ulttyq qaýipsizdik qyzmetiniń (UQQ) tóraǵasy, general-polkovnik Rýstam Inoiatov otstavkaǵa ketti, - dep habarlady Ózbekstan úkimetindegi derbes eki derekkózine silteme jasaǵan Azattyqtyń Ózbek redaktsiiasy. Derekkóziniń aitýynsha, Inoiatovtyń qyzmetinen bosatylǵanyn prezident Shavkat Mirziiaev 31 qańtar kúni UQQ men Bas prokýratýra qyzmetkerleri qatysqan selektorlyq jinalysta aitty.
UQQ-ny 23 jylǵa jýyq ýaqyt basqarǵan 73 jastaǵy Rýstam Inoiatovtyń ornyna osyǵan deiin bas prokýror qyzmetin atqarǵan Ihtier Abdýllaev taǵaiyndaldy.
52 jastaǵy Ihtier Abdýllaev 2015 jyldyń 21 sáýirinen beri Ózbekstan bas prokýrory qyzmetin atqarǵan. Al Abdýllaevtyń ornyna bas prokýror bolyp buǵan deiin prezidenttiń memlekettik keńesshisi bolǵan Otabek Mýrodov taǵaiyndaldy.
Ózbekstan úkimetindegi birneshe derekkózi men úkimetke jaqyn adamdardyń Azattyqqa aitýyna qaraǵanda, Inoiatov otstavkaǵa ketý týraly prezidentke 25 qańtarda ótinish bildirgen.
Ózbekstan úkimetindegi joǵary shendi sheneýnik prezident Shavkat Mirziiaev Qashqadariia oblysyna sapary aldynda Rýstam Inoiatovpen tórt saǵat áńgimeleskenin aitady.
Rýstam Inoiatov eks-prezident Islam Karimov 2016 jyly qaitys bolǵannan beri qyzmetinen aýystyrylmaǵan joǵary shendi az ǵana sheneýniktiń biri bolǵan edi. Inoiatov basqarǵan 23 jylǵa jýyq ýaqytta Ulttyq qaýipsizdik qyzmeti Ózbekstandaǵy eń jabyq jáne quzyreti joǵary qurylym boldy.
Prezident Shavkat Mirziiaev 2017 jyly 22 jeltoqsanda parlamenttiń qos palatasyna arnaǵan joldaýynda Ózbekstannyń quqyq qorǵaý jáne kúsh qurylymdaryn, ásirese arnaiy qyzmetti synaǵan.
Mirziiaev joldaýynda UQQ-nyń quqyqtyq statýsyn, memleketti ishki jáne syrtqy qaýip-qaterden qorǵaýdaǵy qyzmetin, mindeti men quzyretin anyqtaityn «Ulttyq qaýipsizdik qyzmeti týraly» zań qabyldaýdy usynǵan.
