Ózbekstan syrtqy kóshi-qon jónindegi agenttigi ózbek eńbek migranttaryna Reseide jumys tańdaǵan ýaqytta saq bolýǵa keńes berdi, dep habarlaidy Azattyq.
"Birqatar jańalyq arnalary Ózbekstan men Qyrǵyzstan azamattaryn jalaqysy joǵary jumysqa Reseige shaqyrǵan. Mundai jarnamalardyń basty maqsaty - azamattardy Resei men Ýkraina arasyndaǵy janjal aýmaǵyna tartý. Sol sebepti otandastarymyzdan shetelge jumysqa shaqyratyn resmi emes jarnamalarǵa senbeýin suraimyz" delingen agenttik habarlamasynda.
Buǵan qosa, agenttik shetel aýmaǵynda qarýly janjaldarǵa nemese áskeri áreketterge materialdyq tabys úshin jaldanǵandar qylmystyq jaýapqa tartylatynyn eskertti.
Bunyń aldynda MediaHub jýrnalistik zertteý ortalyǵy ózbek jáne qyrǵyz azamattaryn Reseidiń "Vagner" jekemenshik áskeri kompaniiasyna tartyp jatqany týraly material jariialady. Zertteý avtorlarynyń málimetinshe, Ózbekstan men Qyrǵyzstan azamattaryna Ýkrainadaǵy soǵysqa qatysqany úshin 240 myń rýbl ailyq usynǵan.
"Vagner" jekemenshik áskeri kompaniiasynyń jaldamaly jaýyngerleri 2014 jyly Donbassta qarýly jikshilder jaǵynda áskeri qimyldarǵa qatysqan. Áskeri kompaniianyń Resei prezidenti Vladimir Pýtinniń "aspazy", reseilik kásipker Evgenii Prigojinge tikelei qatysy bar delinedi.
Keiingi jyldary "Vagner" jaldamaly jaýyngerleri Siriia, Liviia, Ortalyq Afrika Respýblikasy, Mozambik jáne Sýdandaǵy áskeri qimyldarǵa qatysqan. 2021 jylǵy jeltoqsanda Eýroodaq "Vagnerge" qarsy sanktsiia jariialady.
