Samarqan qalasynda ishki ister organdarynyń qyzmetkerleri qazaqstandyq týristerdi toqtatyp, qujat kórsetýdi talap etken. Artynan janjal shyqqan. Sol kezde politseiler elektroshoker qoldanǵan. Ózbekstannyń ishki ister ministrligi qyzmettik tekseris bastalǵanyn málimdedi, dep habarlaidy Sputnik Qazaqstan.
Jábirlenýshilerdiń biri oqiǵanyń mán-jaiyn aityp berdi. Onyń sózine qaraǵanda, Samarqan qalasyna Qazaqstannan úsh týrist barǵan, taǵy bireýi Tashkentten ushyp kelipti. Barlyǵy túngi saǵat 3:30-dyń shamasynda klýbtan shyǵyp, taksi kútip turǵan. Osy kezde eki politsei kelip, aldymen qujat kórsetýdi talap etken. Odan keiin bólimshege barý qajettigin aitqan.
Tártip saqshylary Samarqan qalasynda komendanttyq saǵat engizilgenin jetkizgen. Alaida naqty qandai zań boiynsha engizilgenin túsindire almaǵan. Ne úshin ustap jatqandaryn da aitpaǵan. Sodan janjal shyqqan. Politseiler áriptesterin shaqyryp, sosyn elektroshoker qoldanǵan.
Ózbekstannyń ishki ister ministrligi jariialaǵan aqparatqa sáikes, 21 mamyrǵa qaraǵan túni Samarqan ishki ister basqarmasynyń patrýldik qyzmeti Mirzo Ýlýgbek kóshesinde týristerdi tekserý kezinde kásibi etika normalaryn óreskel buzǵan.
"Olar qyzmet babyn teris paidalanyp, arnaiy tehnikalyq quraldardy qoldanǵan. Qazirgi kezde ishki ister ministrliginiń jeke qaýipsizdik qyzmeti prokýratýra organdarymen birge qyzmettik tekseristi bastady. Sonyń nátijesinde zańdy buzǵan barlyq qyzmetkerdi jaýapqa tartý jáne jumystan shettetý týraly sheshim qabyldanady", - deidi ministrliktiń resmi ókili.
Tártip buzǵan politseilerdiń basshylary da jaýapqa tartylady.
