Arys qalasyndaǵy jarylys kezinde adasyp qalǵan sábidi bóten áiel óz balarymen birge qutqaryp qalǵan. Úsh jasar Ulan esimdi balanyń jarylys mańaiynan tabylǵany týraly aqparat áleýmettik jelige taraǵan bolatyn. Qaraýsyz qalǵan balaǵa qamqor bolǵan Balqiia Zaýyrbekovamen sóilesip, oqiǵanyń qalai bolǵanyn tilshimiz surap bildi, dep habarlaidy QazAqparat.
«Ulan degen balany ata-anasyna tapsyrýǵa apara jatyrmyz. Balanyń qarny toq. Tamaqtandyryp, sý berdik. Ózimizdiń úsh balamen birge kúieýimiz ekeýmiz Qazyǵurtqa kele jatyrmyz», - deidi Arys qalasynyń turǵyny.
Áieldiń aitýynsha, tótenshe jaǵdai kezinde ózi de bir jasar balasynan kóz jazyp qalǵan.
«Ózimizdiń de bir jasar balamyz adasyp ketken bolatyn. Ony Qazyǵurtta dep estidik. Bul balany ata-anasyna aparyp, óz balamyzdy da taýyp alaiyq dep ketip baramyz», - degen arystyq ana 3 jasar Ulandy qalai jolyqtyrǵanyn aityp berdi.
«Bul bala jarylys bastalyp, adamdar abyr-sabyr bolyp jatqan sátte áskeri bólimniń mańaiynda adasyp qalǵan. Jýyqta ǵana politsiiaǵa kirgen inim Álihan taýyp alyp, jetektep ákelgen qalpy qolyma ustatty. «Balaǵa ie bol, joǵaltpa, qolynan jiberme» dep qatty tapsyrdy. Ózimniń úsh balammen birge muny qolynan tas qylyp ustap birneshe qyr astyq. Iýjnyi jaqta eń sońǵy qyrǵa jetip biraq toqtadyq. Osy kezde joldasym Shymkentten jetipti. Qazir altaýymyz Qazyǵurtqa ketip baramyz. Óziniń aitýynsha balanyń jasy úshte», - deidi Balqiia Zaýyrbekova.
Arys turǵyny kórshiles eldi mekenderdiń apattan bosqan halyqqa qolynan kelgenshe kómektesip jatqanyn aitady.
«Jolda adamdarǵa riza boldyq. Arystan Qazyǵurtqa barar joldyń boiynda adamdar úilerinen shyǵyp, qolynda bar azyǵymen bólisip jatyr. Biri nan, biri bálish, biri sý usynýda. Jas jigitter torsyqpen sý tasyp júgirip júr. Kóliktiń terezesin túsirip, ózderi birinshi bolyp usynǵandaryn kórgende qatty riza boldym. Arystan qashyp shyqqannan keiin qyr basynda 3-4 saǵat sýsynsyz qalǵanbyz. Sol qiyndyqtyń bárin mundaǵy adamdardyń meiirimi umyttyryp jiberedi eken», - deidi Balqiia Zaýyrbekova.
