Óz memleketin ógei etip kórsetýdi kózdeitin antagonistik kózqarastarmen tipten de kelisýge bolmaidy. Bul týraly «Qoǵam jáne memleket: «Birgemiz» - 30 jyldyq seriktestik pen damý» atty IX Azamattyq forýmnyń jalpy otyrysynda QR Memlekettik hatshysy Qyrymbek Kósherbaev aitty, dep habarlaidy QazAqparat.
«Ózi tańdaǵan qoǵamda ómir súre otyryp, óz memleketin ógei etip kórsetýdi kózdeitin antagonistik kózqarastarmen tipten kelisýge bolmaidy. Sol sebepti bizdiń basty ustanymymyz azamat, azamattyq qoǵam, memleket degen úshtik uǵymmen úilesip jatýy tiis. Bizdiń paiymdaýymyzsha, atalǵan úshtiktiń árqaisy - bir-birimen bitispes jaý emes, kerisinshe birliktiń rýhani nárimen sýsyndanǵan birtutas aǵza. Iaǵni, memleket degenimiz el azamattarynyń erkin erik-jigeriniń arqasynda eńse tiktegen konstitýtsiialyq deńgedegi qoǵamdyq kelisimniń máýeli jemisi, mártebeli biigi», - dedi Qyrymbek Kósherbaev.
Sondyqtan da Memlekettik hatshy olardyń ózara jaýapkershiligi men ózara bailanysynyń tereńdeýi el damýynyń da bereketi bolatyndyǵyn basa aitty.
«Dálirek aitsaq, qazirgi tańda jaýapty qyzmet, azamat óziniń egemen eline eńbek sińirip, otandastarynyń da zańdy quqyǵy men erkindiginiń jáne múddesi jolynda qyzmet etetin jaýapty azamattyq qoǵamnyń ajyramas bólshegi bolyp tabylady. Sol sebepti joǵaryda aitylǵan úshtiktiń - jaýapty azamat, jaýapty azamattyq qoǵam, jaýapty memleket degen jańa formýlaǵa ulasýy el damýynda erekshe ról atqarmaq», - dedi ol.
