Olimpiada chempiony Baqyt Sársekbaev elimizdegi sport salasynda sońǵy jyldary oń ózgerister baiqalyp jatqanyn aityp, memleket tarapynan ardager sportshylarǵa kórsetilip jatqan qoldaýdy joǵary baǵalady, dep habarlaidy ult.kz.
Qazirgi ýaqytta Vengriiada jastar quramasymen birge júrgen dańqty boksshy áleýmettik jelidegi paraqshasynda sport salasyndaǵy reformalarǵa qatysty pikirin jariialady.
Onyń aitýynsha, Prezidenttiń sportty mádeniet salasynan bólip, jeke ministrlik qurý týraly sheshimi salanyń damýyna tyń serpin bergen.
«Qazaqstan sportynyń ár kezeńin kórgen adam retinde búgingi jaǵdaidy burynǵy kezeńmen salystyrýǵa tolyq quqyǵym bar. Sport máselelerine erekshe nazar aýdarylyp, uzaq jyldar boiy qordalanǵan túitkilderdi sheshýge múmkindik týdy», – dedi Sársekbaev.
Olimpiada chempiony táýelsizdik jyldarynda qazaqstandyq sportshylar kóptegen jetistikke jetkenimen, keibir Olimpiada jáne álem chempionattarynyń júldegerleri keiin nazardan tys qalyp, qiyn jaǵdaiǵa tap bolǵanyn atap ótti.
«El namysyn qorǵaǵan sportshylardyń arasynda shetelge ketýge májbúr bolǵandar da boldy. Solardyń biri ózimmin. Bir kezeńde shetelden nápaqa izdeýge týra keldi», – dep jazdy ol.
Sársekbaev búginde sporttan shet qalǵan tájiribeli mamandar men burynǵy sportshylardy qaitadan júiege tartý jumystary júrgizilip jatqanyn, olardyń áleýmettik máselelerin sheshýge jáne turaqty jumyspen qamtýǵa kóńil bólinip otyrǵanyn aitty.
Sondai-aq ol mánerlep syrǵanaýshy Mihail Shaidorov tóńiregindegi pikirtalastarǵa toqtalyp, sportshyny qoldaýǵa shaqyrdy.
«Chempion bolǵan soń janashyr da, synshy da kóbeiedi. Barlyǵy óz ornyna keledi», – dedi Olimpiada chempiony.
