18 jeltoqsan kúni 16:30-da elordada Jaqsylyq Úshkempirov atyndaǵy Jekpe Jek saraiynda olimpiada chempiony Daniiar Eleýsinov pen argentinalyq Hýan Ernan Leal jartylai orta salmaqtaǵy IBO chempiondyq belbeýine talasqa túsedi, dep habaralidy QazAqparat.
Halyqaralyq boks keshindegi ekinshi basty kezdesýde asa aýyr salmaq ókili, qos olimpiada qolasynyń iegeri Ivan Dychko (10-0, 10 KO), tájiribeli reseilik boksshy Aleksandr Ýstinovpen (36-5-1, 27 KO) qolǵap túiistiredi.
Al tanymal boksshy Janqosh Turarov (24-0, 17 KO) mysyrlyq Abdýmonem Saidpen (22-1-1, 11 KO) jekpe-jek ótkizbek. Odan bólek, boks keshinde elimizge tanymal Dáýren Eleýsinov, Dáýlet Dáýkenov, Aidar Sháribaev jáne Angelina Lýkas sekildi boksshylar kúsh synasady.
Sonymen qatar el kásipqoi boksynyń tarihynda araǵa 20 jyl salyp alǵash ret 55,3 keli salmaq dárejesi boiynsha, Erjan Zalilov pen Eskendir Harsan, Qazaqstan chempiony ataǵyna KFPB titýly úshin talasqa túsedi. Boks keshi aiasynda jankúierler 13 qazaqstandyq boksshynyń ónerin tamashalai alady.
«Qazaqstannyń Táýelsizdigi qutty bolsyn! Osyndai mańyzdy kún úshin, qonaqjailylyqtaryńyz úshin óte qýanyshtymyn! Jańa titýl úshin jekpe-jekke osylai jaǵdai uiymdastyrǵandaryńyz úshin kóp rahmet!», - dedi argentinalyq Hýan Ernan Leal elordada ótken baspasóz máslihatynda.
Óz kezeginde Daniiar Eleýsinov barsha qazaqstandyqtardy Táýelsizdigimizdiń 30 jyldyq mereitoiymen quttyqtady.
«Otyz jyldyq qarsańynda keremet shoý ótkeli jatyr, barsha uiymdastyrýshylarǵa alǵys bildirgim keledi. Bári joǵary deńgeide ótedi degen senimdemin. Boksshylarymyzǵa tek sáttilik tileimin. Jankúierlerge de qyzyqty bolady dep oilaimyn. Titýldyq kezdesýdiń óz elimde ótip jatqany men úshin úlken mártebe. 2013 jyly Almaty qalasynda Álem chempiony atanǵan edim, endi astanada da chempion bolýdy buiyrsyn», - dedi Eleýsinov.
Aita keteiik, 17 jeltoqsan kúni saǵat 13:30-da boks keshiniń juldyzdary resmi salmaq ólsheý rásimin ótkizedi. Sport jankúierleri 18 jeltoqsanda Daniiar Elýesinovtiń chempiondyq jekpe-jegin «Habar» telearnasynyń tikelei efirinen tamashalai alady.
