Foto: jeke muraǵat
Igilik Orazaly esimi elordalyq kórermenderge jaqsy tanys. Ol – Astana qalasy ákimdiginiń Mýzykalyq jas kórermender teatrynyń jetekshi akterleriniń biri. Atalmysh óner shańyraǵynda ol somdaǵan aishyqty keiipkerler kórermenniń súiiktisine ainalyp úlgerdi.
Juldyzdy qadamy «Astana Musical» teatrynan bastaldy. Ondaǵy eń jarqyn beinesi – Ǵ.Músirepov pen E.Brýsilovskiidiń «Qyz Jibek» etno-folklorlyq miýziklindegi Tólegen róli. Tólegen – Orazalynyń juldyzyn jaqqan ról boldy.
Miýzikl daiyndyǵyn qazaqtyń Tólegeni men Jibegi – Quman Tastanbekov pen Merýert Ótekeshova tamashalaidy. Sol sátte otty Orazaly men jalyndy Inabat Rizabekova sahna korifeileriniń aldynda baryn salyp óner kórsetedi. Daiyndyq sońynda Q.Tastanbekov: «Ashat (Ashat Maemirov – QR eńbek sińirgen qairatkeri, rejisser), myna bala Jibekke Tólegen bolyp emes, Orazaly bolyp ǵashyq bolyp tur. Ekeýi keleshekte úilenip jatsa tań qalma» – dep batasyn beredi.
Foto: jeke muraǵat
Tarlan akterdiń aq nietti batasy oryndalyp, Orazaly men Inabat araǵa eki jyl salyp shańyraq kóterdi.
«Qyz Jibek» miýzikliniń alǵashqy premerasy Qazaqstanda emes, Frantsiianyń Parij qalasyndaǵy «Le Trianon» teatrynda ótti. Orazaly Igilik pen Inabat Rizabekovanyń Tólegeni men Jibegi frantsýz jurtshylyǵyn tańǵaldyrdy. Qazaq ónerin taǵy bir biikke kóterdi.
2018 jyly Dúniejúzilik «Astana» teatr festivali uiymdastyryldy. Óner dodasynyń shymyldyǵy «Qyz Jibek» miýziklimen ashyldy. Sol sátte, festival bastalmas birneshe minýt buryn, birin-biri biraz jyldan beri joǵaltqan eki týys dál sol jerde tabysty. Bul oqiǵanyń kýágeri osy joldardyń avtory – ózim bolatynmyn.
Foto: jeke muraǵat
Orazaly el astanasyndaǵy eki irgeli teatrdyń negizin qalady. Birinshisi – óziniń baǵyn ashqan «Astana Musical», ekinshisi – «Mýzykalyq jas kórermender teatry». Eki óner oshaǵynda da Orazalynyń joly boldy. Qadamy qutty boldy.
Orazaly – minezdi akter. Qai keiipkerin alsaq ta, sahnadaǵy otty janary, óktem daýysy, ishki jan-dúniemen ushtasqan akterlik tehnikasy kórermendi bei-jai qaldyrmaidy.
Máselen, D.Isabekovtiń «Gaýhartas» mýzykalyq dramasyndaǵy Tastan róli. Sahna alańynda naǵyz dala perzentin kóremiz. Onyń jylqysyn erekshe jaqsy kóretin sahnasy – akterlik shynaiylyqtyń dáleli. Tastan ishtei jary Saltanatty da, inisi Qaiyrkendi de jaqsy kóredi. Biraq ony bildirtpeidi. Ishki psihologiialyq sheberlik arqyly onyń sezimi kórermenge anyq seziledi. Bul – Orazalynyń ról jasaýdaǵy ereksheligi.
Foto: jeke muraǵat
Italiian aktrisasy Monika Bellýchchi: «Akterlik oiyn – ol tek qana sózben sóileý emes. Kózben oinatý. Holi Hanter «Pianino» filminde birde-bir sóz aitpai-aq, kóz sheberligi arqyly «Oskar» syilyǵyn aldy» – deidi. Shynynda, Orazaly da teatr sahnasynda kóz janaryn sheber paidalana alady.
«Shámshi» miýziklinde ol Aqan seriniń beinesin jasady. Onyń keskindeýindegi Aqan seri – tek júregi án dep soqqan óner iesi ǵana emes, Shámshige kúsh beretin, shabyt syilaityn qaharman.
Joǵaryda atap ótkenimdei, minezdi akter – bar bolmysyn, minezin, kúsh-jigerin beinesine arnaityn óner iesi. Bul qasiet Igilik Orazalynyń boiyna tolyq sińgen.
Otty akter Orazalynyń izdenisi men eńbekqorlyǵy talai áriptesine úlgi. Ata úmitin aqtap, óner jolynda ter tógip júrgen onyń kórermendi tańyrqatar keiipkerleri azaimaidy dep senemiz.
Bahtiiar Tursyn, teatrtanýshy
