Reseidiń ulttyq media tobynyń direktorlar keńesiniń jetekshisi, burynǵy gimnast Alina Kabaevanyń otbasy bir milliard 250 million rýbl turatyn qymbat úilerde turady. "Otkrytye media" qorynyń zertteý maqalasynda osyndai derek aitylady. Kabaeva jáne onyń týystarynyń atyna alty páter, eki úi jáne tórt oblysta 70 sotyq jer telimi tirkelgen.
2018 jyly shilde aiynda Alina Kabaeva Rýblevo-Ýspenskii shossesinen jer satyp alyp, alǵash ret óz atyna tirkegen. Rosreestr dereginshe, "Ýspenskoe" demalys úii ornalasqan eldi mekendegi 45 sotyq jer soǵan tiesili. Munda 2013 jyldan beri Kabaevanyń apasy Anna Zatsepelina turady. Onyń 45 sotyq jeri nemeresiniń jer telimimen jalǵasyp jatyr. Basylymnyń jazýynsha, Ýspenskoe eldi mekenindegi Kabaeva otbasyna tiesili múliktiń quny 655 million rýbldi quraidy.
"Sobesednik" dereginshe, Olimpiada chempionynyń anasy Liýbov Kabaeva aýdany 334 sharshy metr bolatyn eki qabat saiajaidy jaldap turady. "Otkrytye media" jazýynsha, ol 2010 jyly Sochidiń Adler aýdany Esto-Sadok eldi mekeninen 49 jylǵa jalǵa jer alǵan. Saiajai men jer telimderin jalǵa alǵany úshin úshin Liýbov Kabaeva jáne ózi siiaqty taǵy 11 adam (arasynda "Gazprom" jetekshileri de bar) 101 myń rýbl tóleidi (kúnine 278 rýbl). Al saiajaiǵa jaqyn ornalasqan qonaq úidegi bir bólmege qonyp shyǵý úshin bir adam kúnine 6800 rýbl tóleýi tiis. Sochi sheneýnikteri jalǵa alý qunyn naryq baǵasyna jetkizýdi josparlaǵan, biraq jalǵa alýshylar sot arqyly jeńip alǵan.
Esto-Sadok eldi mekenine jaqyn jerde premer-ministr Dmitrii Medvedevtiń rezidentsiiasy bar. Mundai aqparat Jemqorlyqpen kúres qorynyń "On vam ne Dimon" atty zertteýinde aitylady. Zertteý dereginshe, Resei premer-ministrimen Alina Kabaeva kóp jyldan beri aralasyp turady.
Budan bólek, Alina Kabaevanyń ájesi Anna Zatsepilina jáne ápkesi Leisan Kabaeva Máskeý men Sankt-Peterbýrgten shamamen 740 million rýbl turatyn tórt páter satyp alǵan. "Dojd" telearnasynyń jazýynsha, olar jyljymaityn múlikti prezident Vladimir Pýtin ainalasyndaǵy adamdardan satyp alǵan.
Alina Kabaeva 2013 jyly memlekettik dýma depýtaty bolyp júrgen kezde tabys deklaratsiiasyn jariialaǵan. Onda Kabaeva tabys kólemin 11 million rýbl dep kórsetken. 2011 jyly tómengi palataǵa sailanbai turǵan kezde onyń jinaq qorynda 124 million rýbl qarajat bolǵan. Qazir Alina Kabaeva basqaratyn ultyq media toby jyl saiyn esep bermeidi, sol sebepti Kabaevanyń tabysyn esepteý múmkin emes.
2008 jyly "Moskovskii korrespondent" basylymy Resei prezidenti Vladimir Pýtin áielimen ajyrasyp, Alina Kabaevaǵa úilenedi dep jazǵan. Bul maqala jariialana salysymen gazettiń jumysy toqtap, keiinnen jabyldy. Keibir saittar on jyl ishinde Pýtin men Kabaevanyń ortaq úsh balasy dúniege keldi dep jazady. Biraq taraptardyń eshqaisysy aqparatty rastamady.
