Ótken jyly elimizdiń joldarynda qosymsha 3,5 myń kamera ornatyldy. Bul týraly QR Ishki ister ministrliginiń ákimshilik politsiia komiteti tóraǵasynyń orynbasary Serik Túsipov aitty, dep habarlaidy QazAqparat.
«Jol erejesin buzý faktilerin avtomatty túrde tirkeý kameralary jol-kólik oqiǵalarynyń aldyn alýǵa úlken septigin tigizip otyr. 2020 jyly jergilikti atqarýshy organdarmen ózara is-qimyldyń arqasynda shamamen 3,5 myń qosymsha kamera ornatyldy. Ótken jyly olardyń jalpy sany 36 paiyzǵa artyp, 12 856 kameraǵa jetti», - dedi ol ministrliktiń baspasóz qyzmeti alańynda ótken brifing barysynda.
Onyń dereginshe, ótken jyly atalǵan kameralardyń kómegimen 2,6 mln jol erejesin buzý faktisi anyqtaldy.
Osylaisha elimizde jol erejesiniń árbir ekinshi buzylýy avtomatty kameralardyń kómegimen anyqtalyp otyr.
«Bul is-sharalar jol júrisine qatysýshylardyń tártibin birshama arttyrýǵa septigin tigizdi. Sonyń arqasynda elimizde jol apaty kórsetkishteri aitarlyqtai tómendedi. Kameralar jol júrisin jáne júrgizýshilerdiń tártibin qadaǵalaýda tiimdiligin dáleldedi», - dedi Serik Túsipov.
