2020 jyly 26 myńǵa jýyq júrgizýshi kólik júrgizý quqynan aiyryldy. Bul týraly QR Ishki ister ministrliginiń ákimshilik politsiia komiteti tóraǵasynyń orynbasary Serik Túsipov aitty, dep habarlaidy QazAqparat.
«2020 jyly shamamen 5,6 mln jol júrý erejesin buzý faktisin anyqtadyq. Onyń ishinde 2 mln-nan astamy - jyldamdyqty arttyrý, 1,6 mln - belgiler men jolaqtar talabyn buzý, 264 myńy - jaryq aspabyn paidalanýdy buzý, 221 myńy - jolaýshy men júk tasymaldaý erejesin buzý jáne 188 myńy - aialdama jáne turaq erejesin buzý. Kólikti mas kúiinde basqarǵany úshin 21,4 myń júrgizýshi ustaldy. 25,9 myń júrgizýshi kólik júrgizý kýáliginen aiyrylyp, 21 myńnan astam adam ákimshilik qamaýǵa alyndy», - dedi ol ministrliktiń baspasóz qyzmeti alańynda ótken brifing barysynda.
Onyń atap ótýinshe, elimizde jol-kólik oqiǵasynyń negizgi úsh túri kezinde, atap aitqanda, jaiaý júrginshini qaǵý, kóliktiń aýdarylýy jáne kólikterdiń betpe-bet soqtyǵysýy kezinde ólim-jitim kóp bolady.
Iaǵni, jol apatynan qaza tapqandardyń 64 paiyzy atalǵan jaǵdailar oryn alǵan kezde mert bolatyny anyqtalyp otyr.
«2020 jyly eldi meken aýmaǵynda jyldamdyqty asyrý saldarynan 2 783 jol apaty oryn alyp, 397 adam qaza tapty jáne 3 508-i jaraqattandy. Manevr jasaý erejesin buzý saldarynan 2 430 oqiǵa tirkelip, 198 adam qaza tapty, jaraqattanǵandar 3 myńnan asyp jyǵylady. Elimizde bolatyn árbir onynshy oqiǵa qala syrtynda jyldamdyqty arttyrýǵa qatysty bolyp otyr. Ótken jyly 1 456 oqiǵa saldarynan 400-den astam mert boldy jáne 2 myńnan astam adam jaralandy», - dedi Serik Túsipov.
