Soltústik Qazaqstan oblysynda ótken demalys kúnderi qatty boran men kóktaiǵaqtyń saldarynan patrýldi politseiler men qutqarýshylar damyl kóredi, dep habarlaidy «Ult aqparat».
SQO politsiia departamenti baspasóz qyzmetiniń málimetinshe, aýa raiynyń qolaisyzdyǵyna bailanysty demalys kúnderi respýblikalyq mańyzy bar 5 baǵyt boiynsha jáne barlyq oblystyq mańyzdaǵy avtojoldar jabyldy.
Daýyldy eskertý jóninde sms-habarlama jiberilip, áleýmettik jelilerde jariialanǵan.
Alaida, soǵan qaramastan osy kúnderi patrýl politseileri men qutqarýshylar 22 kólikti qar qursaýynan shyǵaryp aldy.
«Mamliýtka - Qostanai» baǵytynda kezekshilikte júrgen tártip saqshylary jol jiegine túsip ketken «Lada Kalina» jáne «VAZ 2110» avtokólikterin kóredi.
Qatty jel men kóktaiǵaqtan júrgizýshiler rólge ie bola almai qalyp, joldan shyǵyp ketipti.
Júrgizýshilerdiń de, jolaýshylardyń da din aman ekenin kórgen patrýl politseileri «Qazavtodor» JShS-ne habarlasyp, olar aýyr júk kóligin kómekke jiberdi.
Eki mashina da jolǵa shyǵyp, saparyn jalǵastyrdy.
«Joldar jabylyp, kóliktiń júrýine shekteý qoiylǵanymen jolǵa shyqqandar boldy. TJD mamandarymen birge 22 kólikti jáne 62 adamdy qutqardyq. Keptelister bolmaýy úshin 50-60 tehnikadan quralǵan avtokolonnalardy jasaqtap, olar patrýldi ekipajdardyń sońynan ilesip júrip otyrdy. Qazir kúndelikti 15 ekipaj oblys joldarynda jumys isteidi. SQO-nyń aýa raiy qubylmaly, sol sebepti jolǵa shyqpas buryn sinoptikterdiń boljamyna qulaq túrýge keńes beremiz. Sondai-aq alys jolǵa shyqpas buryn tehnikanyń jaǵdaiyn tekserip alǵan jón», - deidi SQO PD patrýldi politsiia batalonynyń komandiri Erlan Mádiev.
