Oblys ortalyǵyndaǵy elektrodtar shyǵaratyn jańa zaýyt jaqynda ǵana ashyldy.
Zaýyt mamandarynyń aitýlarynsha, buǵan deiin jergilikti kásiporyndar dánekerleýshi elektrodtardy Qytaidan satyp alyp júrdi. Qazir zaýytta 30 jańa jumys orny ashyldy. Óndiristegi qural-jabdyqtardy máskeýlik «Roteks» kompaniiasy ornatyp beripti. Kompaniia zaýytta jobany ázirleý, retteý jumystarymen ainalysyp, endi tehnikalyq qoldaý kórsetýde. Kásiporyn bir aýysymda 2 tonnaǵa deiin elektrod shyǵara alady. Elektrod jasaityn sym temir, syrtyn qaptaityn kúkirtti jabyndylar Reseiden ákelinedi eken. Kesilgen symdar arnaiy qurylǵy arqyly ótken kezde kúkirtti jabyndyǵa oralyp shyǵady. Daiyn elektrodtar arnaiy jáshikterde keptiriledi. Mamandardyń aitýynsha, bul qurylǵylar 1 minýtta 120 dana elektrod symyn daiyndap shyǵaratyn kórinedi. Tipti, dánekerleý jumysyna qajetti elektrodtardyń bir emes, birneshe túrin de shyǵarýǵa bolady. Al «Elektrod zaýyty» seriktestiginiń tehnikalyq direktory Aidar Mashrapovtyń aitýynsha, elektrodtarǵa ózimizdiń óńirden, Reseiden de suranys az emes. Sondyqtan, osy bastaǵan jumystary jaqsy qarqyn alyp ketse, jyl sońyna deiin 40 tonna, 2017 jyldyń alǵashqy toqsanynda 70 tonnnaǵa deiin dánekerleýshi elektrodtarmen jergilikti óndiris oryndaryn qamtamasyz etpekshi. Pavlodardyń elektrody reseilik jáne jergilikti zaýyttarda da synaqtan ótip, jaqsy baǵasyn alypty. Al árine, «Qazaqstanda jasalǵan» degen belgisi bar otandyq ónimniń naryqqa jol tartýy bárimiz úshin qýanysh. Aidar Mashrapovtyń aitýynsha, elektrod jasaý ońai emes, mamandarǵa bilik pen tehnikalyq bilim kerek. Sondyqtan, qazir ózi bastap biliktilikterin shyńdap, qosymsha bilim alýda. Reseidiń óndiris oryndarynda bolyp, biraz nárse úirenip qaitypty. Bastysy, ózgege táýeldilikten qutylý, óz ónimderimizdi óz jerimizde shyǵarýǵa úirený. Al elektrod Aqsý men Ekibastuzdaǵy energetikalyq keshen, mashina jasaý, metallýrgiia, munai-gaz, taý-ken óndirisimen ainalysatyn kásiporyndarǵa asa qajet. Qazirgi kezde óńirdegi «Promtehstroi» JShS, «Imstalkon» JShS, «PREK» AQ, «SAEM ZMK» JShS-men elektrodtardy ótkizý kelisimsharttaryna qol qoiý josparlanýda. Zaýytta elektrodtardan bólek suiyq shyny shyǵaratyn jelini iske qosý jobasy da qolǵa alynbaqshy. Suiyq shyny bolattan jasalǵan ónimderdi dánekerleý úshin qajet kórinedi. Basty seriktesteri – Iaroslavl elektrod zaýyty.
– Al bizdiń básekelesimiz árine, qytailyq kásiporyndar. Sondyqtan, basynan bastap sapaly elektrod shyǵarý basty talap. Óitkeni, olardyń elektrod shyǵarýda tájiribeleri mol. Búkil naryqty qamtyp otyr. Tutynýshylar nazaryn endi jergilikti elektrodtarǵa aýdarýymyz kerek, – deidi reseilik zaýyt ókili A.Roslikov.
Elimizde shaǵyn jáne orta biznes damý úshin jańa kásiporyndardyń kóptep ashylýy qajet. Jumyssyzdyq azaiady. Óndiriske jastar keledi. Jańadan elektrod zaýytynyń ashylýy óńirde el ekonomikasynyń damýyna úles qosa alatyn kásiporyndardyń, kásipkerlerdiń kóbeiip kele jatqanyn kórsetedi.
Farida BYQAI,
«Egemen Qazaqstan»
Pavlodar oblysy
Sýretti túsirgen
Valerii BÝGAEV
.jpeg)