7 jeltoqsanda internette jaqynda ǵana Ulybritaniia soty aktivterin buǵattaǵan "Vernyi kapital" kompaniialar tobynyń negizgi aktsioneri Bolat Ótemuratovtyń kompaniia qyzmetkerlerine arnap jazǵan haty jariialandy. Hatta avtor BTA bank shaǵymy boiynsha kompaniia aktivterine shekteý qoiylǵanyn ótken apta sońynda ǵana estigenin jazǵan.
"Ótken aptanyń sońynda BTA banktiń talap aryzy boiynsha "Vernyi Kapital" tobynyń kompaniialaryndaǵy úlesti ielenýge qatysty shekteý engizý týraly aǵylshyn sotynyń qujattaryn elektrondy poshta arqyly aldyq. Shynymdy aitaiyn, shok boldym. Dereý máseleniń mán-jaiyn anyqtai bastadyq. Zańgerler sot sheshiminiń jalǵan qujattarǵa súienip shyǵarylǵanyn rastady. Qazir sot sheshiminiń kúshin joiý úshin talpynyp jatyrmyz, biraq oǵan biraz ýaqyt kerek jáne másele jaqyn arada sheshiledi dep senemin. Sot protsesteri júrip jatqan shaqta resmi túrde málimdeme jasamaimyn. Barlyq kompaniialar qalypty rejimde jumys istei beredi" delingen 6 jeltoqsanda jazylǵan hatta.
Hatta avtor munyń bári "meniń bedelime jáne kompaniia atyna nuqsan keltirip, biznesime ziian tigizý úshin jasalyp otyr" dep tujyrym jasaǵan.
Aita keteiik, ótken aptada Ulybritaniia soty BTA banktiń ótinishi boiynsha Ótemuratovqa tiesili bes milliard dollarlyq aktivti buǵattaǵany belgili boldy.
Wall Street Journal (WSJ) basylymynyń málimetinshe, "BTA" basqalarmen birge biznesmendi de "bankten urlanǵan aqshany jasyrýǵa kómektesti" dep aiyptaǵan.
30 qarashada Ótemuratovqa tiesili "Adal kapital" kompaniialar toby bul habarlamaǵa qatysty jaýap berdi. Olar "BTA Banki" AQ bul talap aryzdy bastapqyda 2015 jyly Muhtar Ábliazov pen Iliias Hrapýnovqa baǵyttaǵanyn túsindirdi.
"Jaýapkerler tiziminiń keńeiýine sáikes, olardyń quramyna 2020 jyldyń qarashasynda Bolat Ótemuratov jáne onyń biznes qurylymyna kiretin birqatar adam qosyldy. Bul talapty qoiýǵa "BTA Banki" AQ men onyń zańgerleri usynǵan jalǵan qujattar negiz boldy. Jaqyn arada talap aryzǵa bailanysty narazylyq bildiriledi", - delingen "Vernyi Kapital" málimdemesinde.
Keiin kompaniialar tobynyń bas direktory Erlan Ospanov Facebook paraqshasynda qalypty rejimde jumys istep jatqandaryn jazdy.
"Biz barlyq aktivke ielik etýge qatysty shekteý sharalary týraly aǵylshyn sotynyń sheshimin aldyq. Bul shekteýler Bolat Ótemuratov aktsioneri bolyp tabylatyn kompaniialardyń, onyń ishinde bankter, qonaqúiler, telekom-operatorlar, taý-ken óndirý kompaniiasy men fast-fýd meiramhanalarynyń operatsiialyq qyzmetine qatysty emes jáne olarǵa áser etpeidi. Aktivterdi toqtatý menshik iesiniń ózi aktsioner bolyp tabylatyn kompaniialardy basqarýǵa qatysý quqyǵyn shektemeidi jáne biznesti júrgizýge kedergi keltirmeidi", - dep túsindirdi Ospanov.
Ol halyqaralyq advokattardyń BTA bankiniń talabyna jaýaby zańgerlerge jiberilgenin atap ótti. Shaǵym daiyndalyp jatyr. Kompaniiaǵa sotta bank talaptaryna narazylyq bildirý úshin ýaqyt qajet.
"Forbes – Qazaqstan" jýrnalynyń málimeti boiynsha, Bolat Ótemuratov Qazaqstandaǵy eń bai adamdardyń qatarynda tórtinshi orynda tur. Jýrnaldyń jazýynsha, ol aktivteriniń kólemi boiynsha Qazaqstandaǵy eń iri úshtikke kiretin ForteBank-ti baqylaidy (mamyr aiyndaǵy derek). 2019 jyldyń sońyndaǵy málimet boiynsha, bank aktivteriniń aýqymy 2,07 milliard teńge bolǵan. Sonymen qatar onyń taý-ken, munai-gaz jáne telekommýnikatsiia salalarynda aktivteri bar.
