Azamattyq nekedegi áielin asa qatigezdikpen óltirgeni úshin 24 jylǵa sottalǵan eks-ministr Qýandyq Bishimbaevtyń burynǵy áieli Nazym Qaharman balalarynyń ákesin ata-ana quqyǵynan aiyrý úshin Bas prokýratýra men Joǵarǵy sotqa júgindi, dep habarlaidy "Ult aqparat" Stan.kz aqparat agenttigine silteme jasap.
Nazym Qaharman Astanada ótken baspasóz konferentsiiasynda Bishimbaevty ata-ana quqyǵynan aiyryp, balalarynyń tegin aýystyrý úshin sotqa aryz jazǵanyn aitty. Alaida sot onyń bul aryzynan bas tarqan. Aitýynsha, eks-ministr Saltanat Núkenovamen azamattyq nekede turǵandyqtan, Bishimbaev otbasy múshesin nemese jaqynyn óltirgen joq dep sanalady eken. Alaida Nazym balalarynyń Saltanatty otbasy múshesi jáne ákesiniń áieli retinda qabyldaǵanyn aitty.
"Ókinishke orai, shyndyqty aityp, kómek suraýǵa májbúrmin. Menińshe, sottyń aryzymdy qabyldamaýy ádildikke jatpaidy. Sottyń nazaryn aýdarý úshin qoǵamǵa, Bas prokýratýraǵa jáne Joǵarǵy sotqa júginemin. Mindetti túrde appeliatsiialyq sotqa beremin. Óitkeni men úshin balalarymnyń bolashaǵy, qyzyǵýshylyqtary men tulǵa retinde qalyptasýy mańyzdy. Balalardy Saltanat Núkenovany otbasy múshesi retinde qabyldaǵanyn dáleldedik. Alaida sot múldem basqa sheshim shyǵardy", – dedi Nazym Qaharman.
Aitýynsha, balalardan jaýap alynǵan, dese de ony eshkim eskermedi.
"Sýdia balalardyń jasqanshaq emes ekenin jáne olardyń minez-qulqynan psihologiialyq jaraqatty baiqamaitynyn aitty. Qýandyq balalarynyń ózimen, ata-apasymen sóileskenin qalaidy. Alaida balalar muny qalamaidy. Balardy májbúrlei almaisyń", – deidi Nazym Qaharman.
Onyń advokaty Madina Ýatbekovanyń aitýynsha, Bishimbaev birinshiden, adam óltirgendikten, ekinshiden, balalarǵa psihologiialyq zábir kórsetkendikten ony ata-ana quqyǵynan aiyrý týraly aryz jazǵan. Alaida sot ta, prokýratýra da Saltanat Núkenova men Bishimbaev zańdy nekede bolmaǵandyqtan ol jaqynyn nemese otbasy múshesin óltirmedi degen tujyrymǵa keldi.
"Bul múlde durys emes ári zańsyz. Eger ata-ana qylmys jasasa, memleket ony ata-ana quqyǵynan aiyrady. Osylaisha balany qorǵaidy. Biraq sot nege ekpindi "otbasy múshesi" degen sózge qoiyp otyr? Ne sebepti sot kez kelgen qylmys jasaǵan adamdy ata-ana quqyǵynan aiyrmaidy", – deidi zań ókili.
Nazym Qaharman balalarynyń tegin aýystyrmaq bolǵan. Biraq sot onyń bul aryzyn da qabyldamaǵan.
